BAGUIO CITY (PIA) -- Patuloy ang pagpapatupad ng pambansang pulisya ng anti-illegal drugs operations sa ilalim ng bago at pinal na bersyon nito na ADORE o Anti-Illegal Drugs Operation through Reinforcement and Education.

Ipinaliwanag ni Police Regional Office - Cordillera Deputy Regional Director for Operations PCol. Benjamin Sembrano na nabuo ang naturang programa dahil sa mga kritisismo sa kampanya ng PNP laban sa ilegal na droga gaya ng Oplan Tokhang at Oplan Double Barrel.

"Ito na po 'yung final version namin anchored on a holistic approach through reinforcement and education-based strategy. This is  a major support of the PDEA and all local government units to eradicate proliferation of illegal drugs in the country," saad ni Sembrano.

Aniya, ang program framework ng ADORE ay may walong E's kabilang na ang Engineering the organization structure, massive Education, Extraction of information, Enforcement, Enactment of laws, Environment, Economic, at Evaluation.
 

Ayon kay Sembrano, nagkakaroon sila ng massive comprehensive re-education sa lahat ng PNP personnel na   kasama sa anti-drugs operation.

Sa ngayon, ang PNP Drug Enforcement Group (PDEG) ang national support unit ng PNP o counterpart ng PDEA sa pagsugpo sa mga high value individuals habang ang mga police stations naman ang nakatalaga para sa mga street level individuals.

"One thing na maganda dito sa enforcement, na-identify na po natin, meron po tayong pyramid ng illegal drugs distribution. 'Yung mga high value individuals or targets, this are financiers, tagatustos sa mga sindikato, manufacturers or importers of illegal drugs, bigtime suppliers, distributors of illegal drugs, under dito ay 'yung supply chain, ang nakatutok dito ay ang PDEA at PDEG ng PNP," ani Sembrano.

Sa Enactment of law, itinalaga na umano ang legal service upang aralin ang mga posibleng pagbabago sa batas kaugnay sa pagsugpo sa ilegal na droga.
 
Iginiit naman ng opisyal na ang laban sa ilegal na droga ay responsibilidad ng bawat isa.
 

"Maganda po ang samahan ng PDEA at ng PNP. 'Yung effort ng PNP, mutually complementing 'yung effort ng PDEA. All the stakeholders, all the government agencies, at the whole community, meron pong inherent responsibility ang lahat even 'tong mga religious groups, kailangan po nilang makialam," pahayag ng opisyal.

 
Kinakailangan din aniya ang good governance lalo na sa mga namumuno upang matulungan at mapaunlad ang pamumuhay ng mga mamamayan kung saan, maiiiwas ang mga ito sa pagkalulong sa ilegal na droga. (JDP/DEG-PIA CAR)