TUGUEGARAO CITY, Cagayan (PIA) - - Dinayaw na Office of the Civil Defense (OCD) at anna Regional Disaster Risk Reduction and Management Council na Rehiyon Dos y City Disaster Risk Reduction and Managment Office (CDRRMO) na Tuguegarao kabalid-da nga makipattadday ta National Simultaneous Earthquake Drill (NSED). 

Yaw nga siyudad y sentro na nikessimmuan na NSED, nu sitaw nepasingan na CDRRMO y rulay na apparan da ta parresponde nu mallunik. 

Ngamin nga nevulu ta aktibidad ay kingwa da y duck, cover, and hold procedure turi ta kakwa na earthquake drill ta balay-gobyernu na Tuguegarao.

Neammung taw, nepasingad-da y fustu nga evacuation ta seguro nga lugar, y kakwa na search and rescue ta biktima ira na naddabba nga babalay anna istruktura, tuange y keyalawa na first aid ta totolay nga nabigaran anna karuap-pa nga bibiktima.

Segun kani OCD Regional Director Leon DG Rafael, kuruga makapabbaw y nepasingan na CDRRMO, netallugaring turi ta kakwa da ta search and rescue operations anna first aid.

Dinayaw gapa ni Rafael danuri neyammung nga allikaman na CDRRMO, nga yaya ay mawak kanu nga parigan na ngamin nga lokal nga gobyernu ira. 

"Hinahangaan natin ang kahandaan ng Tuguegarao City sa ganitong klase ng sakuna. Ang ganitong klase ng pagtatanghal ay paraan din para makita  ang ating mga proseso kung meron pang kailangang baguhin, idagdag o palitan (Makapabbaw i apparan na Tuguegarao City ta kunnaw nga klase na ziga (lunik). Y kunnaw nga aktibidad ay makwa tapenu masingan nu kunnasi y proseso ira nu egga y mawak nga ulian, meammung, onu matalian)," kunni Rafael. (JKC/PIA Region 2/with reports from Oliver T. Baccay)