CEBU CITY, Cebu, Hunyo 9 (PIA) -- Gipirmahan na sa Philippine Health Insurance Corporation (PhilHealth), Department of Finance (DOF), Department of Health (DOH), Philippine Amusement and Gaming Corporation (PAGCOR), ug Philippine Charity Sweepstakes Office (PCSO) niadto’ng Mayo 31 ang Joint Circular nga magpatuman sa mga alokasyon alang sa Universal Health Care sa nasud subay sa Republic Act 11223 o ang Universal Health Care Act.
Sa simple nga seremonyas nga gipasiugdahan ni PhilHealth President and CEO Atty. Dante A. Gierran, gitambongan ang mao’ng kalihokan ni OIC-Deputy Treasurer ug PhilHealth Board Member Eduardo Anthony G. Mariño III sa ngalan ni Finance Secretary Carlos G. Dominguez III; Undersecretary Mario Villaverde sa ngalan ni Health Secretary Francisco Duque III; PAGCOR Chairperson ug CEO Andrea Domingo; ug PCSO Chairperson Anselmo Simeon Pinili.
Gilatid sa joint circular ang mga giya nga “mopatuman sa masangputon ug malungtaron nga pundo gikan sa PCSO, PAGCOR ug Nasudnong Pangagamhanan ngadto sa individual based services sa PhilHealth ubos sa Universal Health Care Program, subay sa Rule IX, Section 37.2 may labot sa Section 37.3 sa Implementing Rules and Regulations kun IRR sa RA 11223.”
Gitagana sa UHC Law nga ang 50 porsyento nga bahin sa National Government gikan sa kita sa PAGCOR ingon nga nakabutang sa Presidential Decree No. 1869, as amended; ug 40 porsyento sa Charity Fund, net sa Documentary Stamp Tax Payments, ug mandatory contributions sa PCSO sumala sa gilatid sa RA No. 1169, as amended, ibalhin ngadto sa PhilHealth alang sa pagpausbaw sa mga benefit packages niini nga itagana sa kadaghanan sa mga miyembro nganhi ug sa gawas sa nasud.
Lakip sa mga benepisyo nga mapalapdan subay sa konsultasyon uban sa PAGCOR ug PCSO mao ang pili nga mga medikal ug surgical procedures; pagpausbaw sa Case Rates alang sa hemodialysis ngadto sa 156 ka sesyon; pagpadako sa Z benefit packages alang sa pili nga orthopedic implants, post kidney transplant, breast cancer, prostate cancer, cervical cancer, open heart surgery alang sa mga bata (ventricular septal defect ug tetralogy of fallot); ug pisikal nga pagpanambal ug rehabilitasyon.
Ang gikinahanglan nga pundo alang sa mao’ng pagpausbaw sa benepisyo pagbuhian ngadto sa PhilHealth pinaagi sa General Appropriations Act sugod sa tuig 2023.
Sa iya’ng mensahe, nagkanayon si Gierran nga “this infusion of funds from PAGCOR and PCSO will help us achieve Universal Health Care” (kining pagtagana og pundo gikan sa PAGCOR ug PCSO, makatabang nato sa pagkab-ot sa Universal Health Care) ilabi na kung ang pagpausbaw sa benepisyo sa mga miyembro ang gikonsidera. (HFG/PIA7)
