TAGBILARAN CITY, Bohol, June 13 (PIA) -- Kinatibuk-an nga 164 ka mga batan-ong Bol-anon ang mahimong makalibre sa kolehiyo human sila mi-qualify human sa eksaminasyon alang sa scholarship sa Department of Science and Technology (DOST) para sa undergraduate studies.
Ubos sa DOST Science Education Institute, ang mga nakapasar nga Bol-anon mahimong katabangan sa kagamhanan pinaagi sa P40 mil nga tuition fee matag tuig, P10 mil nga book allowance matag tuig, P7mil nga binuwan nga allowance, may clothing ug transportation allowance, graduation allowance ug thesis allowance.
Aduna pa usay group insurance nga mokabat sa P10mil.
Segun sa kasayuran nga gipagawas sa DOST Bohol Provincial Science and Technology Center (DOST BOHOL PSTC), 101 ka mga kabataan ang mingqualify sa scholarship ubos sa R.A. 7687 o ang “Science and Technology Scholarship Act of 1994.”
Kini nga tanyag sa scholarships alang niadtong mga may maayo’g utok ug mga estudyante nga dili makapagasto sa ilang mga pamilya tungod kay ang kita niini, dili ikasarang sa balayronon.
Kini sila nga mga scholars, gikinahanglan nga mokuha sa mga pili nga natad sa siyensya sama sa basic sciences, engineering, uban pang applied sciences, ug science ug mathematics education.
Sa laing bahin, 63 usab ka Bol-anong estudyante ang nakaparas sa science screening alang sa susamang scholarship ubos sa merit system.
Segun sa RA No. 2067, ang DOST-SEI nga programa, kanhi nailhan sa National Science Development Board o National Science and Technology Authority Scholarship, gihatag ngadto s amga kabataan nga may tag-as og grado sa science ug mathematics ug kinsa buot mosubay sa pagpanarbaho sa natad sa science ug technology.
Sa 101 ka nakapasar sa RA 7687, 51 niini ang nia sa Bohol, 6 ka Bol-anon ang tua nageskwela sa gawas sa probinsya ug may lain pang 44 nga nakapasar apan kulang pa ang ilang mga papeles.
Sa merit system usab, sa 64 ka mga nakapasar sa screening, 31 niini nia sa Bohol, 5 ang tua nageskwela sa gawas sa lalawigan ug may 27 pa nga wala makakompleto sa ilang mga papeles.
Sa pahibaw sa Bohol PSTC, ang tanan nga nakapasar na, kinahanglang magpaabut sa opisyal nga pahibaw gikan sa DOST Bohol kabahin sa schedule sa Scholarship Orientation.
Sa laing bahin, alang niadtong mga niqualify na apan wala pa makompleto ang ilang mga rekisitos, magpaabut pa sa text message sa DOST Bohol aron mahibaw kon unsa nga dokumento ang kinahanglang isubmitir aron maapil sa revalidation kay kini kinahanglan makaabut na sa DOST Bohol taman sa sa Hunyo 24 lamang.
Alang niadtong buot masayud kon kinsa ang mga naka qualify, bisitaha ang DOST BOHOL PSTC Facebook page. (RAHC/PIA7 Bohol)
