BASCO, Batanes (PIA)- - Isang Provincial Agro-Trade Fair ang pinasinayaan sa Batanes bilang bahagi ng taunang papagdiriwang ng Batanes Founding Anniversary o Payuhuan Festival na ginaganap tuwing ika-26 ng Hunyo.
Ito ang kauna-unahan makalipas ang dalawang taon mula noong pumutok ang pandemiya ng COVID-19 sa bansa.
Ayon sa mensahe ni Batanes Governor Marilou Cayco sa pambungad ng programa, mahalaga ang Agro-Trade Fair sa pagdiriwang ng Batanes Foundation Day dahil dito naipapakita at naipagmamalaki ang mga natatanging mga produkto at ani ng probinsiya.
Dagdag niya, ang mga produktong ito ay hinubog ng matanda at makulay na kultura at tradisyon, na siya namang simbolo ng katatagan ng mga Ivatan at ng lalawigan.
Ayon naman sa mensahe ni BFAR Regional Director Angel Encarnacion, mahalaga ang pag-iinvest sa agriculture at fishery businesses kasama ang turismo para sa muling pagbangon ng ekonimiya ng probinsiya sa gitna ng pandemiya. (JKC/PIA BATANES/with reports from Christine E. Barbosa)
