CIUDAD TI TUGUEGARAO, Cagayan (PIA) - - Inyebkas dagiti opisial ti Department of Education (DepEd) ti optimismo nga amin a pagadalan iti rehion ti Cagayan Valley ket nakasaganan para iti face-to-face classes iti sumaruno a school calendar year .

Kinuna ni Amir Aquino, hepe ti DepEd Public Affairs Unit, a kaadduan kadagiti pagadalan ditoy rehiyon ket nakaipatungpal dan ti limited in-school classes ita a bulan ti Hunio. 

Kinunana pay nga uppat kadagiti siam a dibision ti pagadalan iti rehion ti nangipatungpal iti 100% face-to-face classes a pakairamanan ti probinsia ti Batanes, Siudad ti Cauayan, Siudad ti Ilagan, ken Siudad ti Tuguegarao.

"Adda dagiti nabatbati a siam a pulo ket siam (99) a pagadalan a saan pay a pinalubosan dagiti bukodda a Local Government Units a mangituloy iti face-to-face classes gapu iti sumagmamano a nabatbati a kaso ti Covid 19," kinuna ni Aquino.

Kinunana pay a mabalinen a maaramid a rupanrupa ti Moving-Up ken Graduation ceremonies kadagiti pagadalan publiko.

Nupay kasta, nasken a nainget a masurot dagiti health protocols a pakairamanan ti pannakaisayangkat ti programa iti saan a nasursurok ngem dua nga oras ken panangipasdek kadagiti limitasion para iti agingga iti dua a tao iti tunggal estudiante a mapalubosan kadagiti lugar. 

Inyunay-unay na pay a, nupay naibaban ti alert levels,adda pay laeng ti pangta ti Covid 19 pandemic a kasapulan a suroten ti publiko dagiti protocol ti salun-at. (OTB/PIA Cagayan with reports from Angelo Mateo Dela Cruz)