TAGBILARAN CITY, Bohol, June 15 (PIA) -- Nanawagan ang OCTA Research sa publiko nga magpabakuna na samtang  libre pa kining ginahatag sa gobyerno.

Kining panawagan gihimo ni Dr. Guido David taliwala na usab sa nagpabiling ubos nga  turnout sa pagbakuna ilabi na sa booster dose.

Gipasabot ni David nga posibleng dili na himuong free o libre ang pagbakuna batok sa COVID-19 sa umaabot.

Kini matud pa kun tanggalon na sa gobyerno ang State of Public Health Emergency sa tibuok nasod.

Matud pa nga kun wala na ang public health emergency, dinhi na ibalhin sa gobyerno ngadto sa pribadong sektor ang pagpahigayon og bakuna mao nga nagpasabot nga magbayad na ang bisan kinsang magpatupok sa COVID vaccine.

Subling gitumbok sa OCTA fellow nga mahinungdanon ang booster shot tungod kay makatabang kini nga mapalig-on ang immunity sa usa  ka tawo ug magbaton og proteksyon batok sa kontaminasyon sa COVID-19. (ECB/PIA7 Bohol)