TAGBILARAN CITY, Bohol, June 21 (PIA) -- Aprubado na sa Department of Health (DOH) ang paghatag sa unang Pfizer booster shot alang sa nag-edad 12 hangtod 17 anyos sa Pilipinas.

Kini ang gi-kumpirma ni Health Undersecretary Maria Rosario Vergeire adlaw’ng Hunyo 21 sa media viber group sa dihang gipangutana kun aprubado na ba gyud ni DOH Kalihim Francisco Duque III ang paghatag sa maong booster shot nga Pfizer.

Matud pa ni Vergeire, gi-draft na sa DOH ang guidelines niini ug sa labing daling panahon mapagawas na kini.

“Yes, guidelines are being drafted already by DOH,” matud pa ni Vergeire.

Kining lakang gihimo matud pa aron masulbad ang nagkahinay nga immunity sa primary vaccine series batok sa COVID-19.

Ang booster dose sa Pfizer lamang ang gi-aprobahan tungod kay kini lamang ang nihatag og datos ug nag-apply og Emergency Use Authorization (EUA) sa Food and Drug Administration (FDA).

Ang EUA alang sa Pfizer isip booster shot sa mga nahisgotan nga menor-de-edad gi-amyendahan sa FDA. (ECB/PIA7 Bohol)