TAGBILARAN CITY, Bohol, Aug. 19 (PIA) -- Posibleng sa sunod tuig pa mahimong tugotan ang paggamit og booster shots batok sa COVID-19.

Gipahayag ni Department of Health (DOH) Usec. Myrna Cabotaje sa usa  ka online forum nga kini tungod kay padayon pa kining gitun-an sa pagkakaron.
Gipaabot usab nga may lig-ong desisyon ang tanang grupo sa mga eksperto sa gobyerno sa mga mosunod nga buwan kalabot sa maong hisgotanan.

Apan sa pagkakaron, matud pa sa mga eksperto nga wala pa gihapon gi-rekomenda ang pagpatupok og booster o ang ikatulong dose alang sa duha  ka dose nga bakuna. 

Matud pa ni Cabotaje nga kun mahitabong tugtan na ang booster shots sa sunod tuig, prayoridad pa gihapon ang mga frontline healthcare workers ug kadtong mga adunay comorbidity. 

Samtang gi-depesahan usab sa kalihim ang hinay nga COVID vaccination tungod usab sa hinay nga pag-abot sa mga suplay sa bakuna.

“It’s slow in the sense na kulang ‘yung bakuna and it’s slow in the sense na may mga intervening factors, especially the surges,” pahayag pa ni Cabotaje.

Matud pa niini nga gitarong pa sa mga lokal nga kagamhanan ang ritmo sa pagpamakuna tungod na usab sa kakulang sa mga bakuna ug health workers. (ecb/PIA7 Bohol)