TAGBILARAN CITY, Bohol, July 13 (PIA) -- Sa labing bag-o nga natala nga kasayuran gikan sa Department of Health (DOH), mikabat na sa 5,811 ang mga naayo sa sakit sa usa ka adlaw lamang niadtong Lunes, hinungdan nga kini niabot na sa kinatibuk-ang 1,402,918 ang mga naayo sa COVID-19 sa nasud.

Matod sa DOH, ang maong ihap katumbas sa 94.9 percent recovery rate taliwala sa mga kadaghan sa mga nanga-igo sa sakit sa tibuok nasud.

Ang DOH usab nakatala ug 5,204 ka mga bag-ong kumpirmadong kaso nga nagdala sa kinatibuk-ang ihap nga 49,128 ka mga aktibong kaso sa tibuok nasud.

Sa mga aktibong kaso, 89.6 percent niini ang mild, 4.7 percent ang mga wala’y simtomas, 2.5 percent ang severe, 1.72 percent ang moderate ug 1.5 percent ang naa sa critical condition.

Ang DOH nakatala usab og bag-ong 100 ka mga namatay nga nagpasaka sa kinatibuk-ang ihap sa mga nangamatay tungod sa nahisgutang sakit, ngadto na sa 26,015. (RAHC/PIA7 Bohol/John Paul Elicano)