TAGBILARAN CITY, Bohol, July 7 (PIA) -- Gi-awhag sa Department of Health (DOH) ang publiko nga dili sipyaton ang pagpabakuna sa ikaduha nga doses batok Coronavirus Disease 2019 (COVID-19).

Matod ni Department of Health Secretary Francisco Duque III, kung ang usa ka indibidwal mapakyas sa pagpabakuna sa gihatag nga iskedyul, kini mahimo pa nilang madawat sa sulod sa unom ka bulan.

“Iyan pong pangalawang dose, batay sa vaccine expert panel ng Department of Health, puwede po iyan between three to six months, iyong pagitan noong una at ikalawang doses,” pahayag pa ni Duque kaniadtong Hulyo 6.

Dugang pa niya, dili angay mabalaka kung kini malangan sa pagpabakuna, kay kini makuha pa sa ubang adlaw, ang mahinungdanon nga magpabakuna gihapon sa ikaduha nga doses.

Niini, sa natala sa Hunyo 4, ang Pilipinas nagdumala sa kinatibuk-an nga 11, 708, 029 nga doses sa bakuna, diin sa kinatibuk-an adunay 8, 839, 124 ka mga taw ang nakakuha sa ilang unang doses, samtang 2, 868, 905 ka mga indibidwal ang nakakumpleto na sa pagpabakuna sa ikaduha nga doses.

Sa laing bahin, padayun gihapong gi-awhag ang mga katawhan nga dili mag mahadlukon sa pagpabakuna ug sundon gihapon ang mga health protocols kay kini makatabang sa pag likay sa pagkanap sa virus. (RAHC/PIA Bohol/Mae Ann Grace C. Rubia)