BOCAUE, Bulacan (PIA) -- Level 2 hospital na ang ngayo’y opisyal nang tatawagin bilang Joni Villanueva General Hospital na ipinatayo sa bayan ng Bocaue sa Bulacan.
 
Ito’y matapos lagdaan ni Pangulong Duterte ang Republic Act 11720 na nagbibigay ng estado sa naturang ospital bilang isang ganap na general hospital.
 
Ayon kay Provincial Department of Health o DOH Office spokesperson Irish San Pedro, ang pagiging isang Level 2 na ospital ay nagbibigay ng mandato upang magkaroon ng mga pasilidad gaya ng intensive care unit, pediatrics, obstetrics , gynecology, surgery, mga laboratoryong kumpleto ang kagamitan, at karagdagang bed capacity.
 
Sa nasabi ring batas, isinasaad na ang Joni Villanueva General Hospital ay direktang maipapailalim sa pangangalaga at pangangasiwa ng DOH, mula sa ngayo’y extension facility lamang ng Jose B. Lingad Memorial General Hospital o JBLMGH na nakabase sa lungsod ng San Fernando sa Pampanga.
 
Ibig sabihin, obligasyon na mismo ng DOH na makagawa ng Hospital Development Plan gaya ng pagdadagdag ng bed capacity na kasalukuyan ay nasa 50 beds.
 
Kasama rin dito ang pagpapabuti ng mga health care facilities, service capability at human resource complement para sa pagiging ganap na isang general hospital.
 
Taong 2017 nang ipatayo ito ng pamahalaang bayan ng Bocaue bilang isang inisyal na lokal na ospital.
 
Pormal na binuksan noong Mayo 2021 bilang extension facility ng JBLMGH sa mga pasyenteng may mild at severe COVID-19.
 
Ayon kay Senador Joel Villanueva, umaabot na sa 300 milyong piso ang nagugol sa pagpapatayo ng Joni Villanueva General Hospital mula sa taunang pambansang badyet at sa Health Facility Enhancement Program.
 
Iba pa rito ang isang unit na bagong ambulansya mula sa DOH.
 
Matatagpuan ang nasabing ospital sa 9,425 metro kudradong lupa malapit sa pinagtatayuan ngayon ng munisipyo ng Bocaue na ilang metro lamang mula sa Ciudad de Victoria Interchange ng North Luzon Expressway. (CLJD/SFV-PIA 3)