TAGBILARAN CITY, Bohol, June 22 (PIA) -- Gipagawas na sa Department of Health (DOH) ang mga sumbanan o guidelines alang sa pagpabakuna og booster shot sa mga batang immunecompromised nga may edad 12 hangtod 17 anyos.
Base dinhi, dugang 0.3 ml dose sa Pfizer/BioNTech vaccine ang ihatag sa nahisgotang edad nga dili moubos sa 28 ka adlaw human sa ilang ikaduhang dose, base sa sumbanan nga gilagdaan ni Health Undersecretary Myrna Cabotaje, pangulo sa National Vaccination Operation Center.
Ang mga site sa pagbakuna nga nakabase sa mga tambalanan ang tugotang maghatag sa ikatulong dose, base sa guidelines.
Kauban sa mga miyembro sa immunecompromised pediatric age ang mga indibidwal nga nagdawat og aktibong pangtambal sa kanser; mga indibidwal nga nipaubos sa dialysis; mga indibidwal nga may moderate o grabeng primary immunodeficiency; mga indibidwal nga adunay advanced o untreated HIV infection; mga indibidwal nga adunay aktibong pangtambal nga may taas nga dose nga corticosteroids o uban pang mga tambal nga mahimong pugngan ang immune response.
Apil usab ang mga indibidwal nga nakadawat og organ transplant ug nag-inom og tambal aron mapugngan ang immune system; mga indibidwal nga nakadawat og stem cell transplant sulod sa milabay nga 2 ka tuig ug nag-inom og tambal aron pugngan ang immune system; mga tawo nga nabuhi nga may sakit nga autoimmune; ug mga indibidwal nga na-diagnose nga may mga kondisyon nga gikonsiderar nga adunay kapareho nga kahimtang sa immunocompromised nga estado sama sa gitambag sa attending physician.
Niadtong Hunyo 14, gi-amyendahan sa Food and Drug Administration (FDA) ang emergency use authorization (EUA) sa Pfizer aron maapil ang dugang doses alang sa maong age bracket.
Kahinumdoman nga girekomenda sa Health Technology Assessment Council (HTAC) ang dugang doses alang sa mga immunocompromised nga kabataan.
Kining kalamboan agi og pagpangandam sa DOH sa pagsulod sa mas daghang transmissible variant nga mahimong makaingon sa pagsaka sa mga kaso sa COVID-19 ug sa mga tambalanan sa Agosto diin magsugod na ang pagpahigayon sa face-to-face classes. (ECB/PIA7 Bohol)
