TAGBILARAN CITY, Bohol, July 11 (PIA) --  Sa mandu sa gobernador, buksan ang tanan nga mga talaan ug panalipdan ang mga ebidensya nga buot matan-aw sa bag-o lamang nga gitukod nga Office of Governance Accountability and Review (OGAR).

Agi og pagpagahum sa OGAR nga unang gipresentar nga linawas sa media atul sa Press Conference didto sa Capitolyo, Julyo 11, gipadayag ni Gobernador Erico Aristotle Aumentado nga ang bag-ong buhatan nga magtrabaho ubos sa buhatan sa Gobernador, pangulohan ni kanhi Cabinet Secretary Leoncio Evasco.

Ang OGAR gitukod aron tukion ang kamatuoran ug pasakaan sa posibleng mga kaso ang si bisan kinsa man ang mapamatud-an nga nakasupak sa Anti Graft and Corrupt Practices ug ang Code of Ethical Standards for Government Officials and Employees.

Ang tanang transaksyones nga tuki-on, kadtong nahitabo sa wala pa ang Hulyo 1. 

Ug aron mapagamhan ang nahisgutang buhatan ni Evasco, gitugotan kini nga makalili sa tanan nga records sa kagamhanang probinsya sa bisan unsa nga format (soft copy o hard copy, email, memorandum, administrative orders, Executive Orders o opisyal nga mandu) gikan sa bisan hain man nga buhatan sa Kapitolyo. (RAHC/PIA7 Bohol)