SYUDAD SANG ROXAS, Capiz (PIA) -- Naglab-ot sa 121 ka mga trabahador nga nakabaton sang P1,985,040.15 nga kantidad sang "settlement claims" ang nabuligan sang Department of Labor and Employment (DOLE) - Capiz Field Office kaangot sa implementasyon sang Single Entry Approach (SEnA) nga programa sang ahensya sa nauna nga anom ka bulan karon nga tuig 2022.

Samtang, ang mataas nga accomplishment sa SEnA sang talatapan ang kaangot naman sa direktiba ni Atty. Sixto T. Rodriguez nga direktor sang DOLE Regional Office 6 nga tutokan ang pagproteksyon sa mga kinamatarong sang mga trabahador kag maghatag sang madasig nga sabat sa mga ginapaabot nga problema sang mga ini.

Ang SEnA ang isa ka administratibo nga pamaagi agud nga maghatag sang madasig, wala sang ginapaboran, indi sang magasto kag mahapos nga sistema sa paghusay sang mga isyu kag hilugot-anon sa trabaho agud nga indi na mag-abot pa sa mga aktwal nga pagkinasuhay. (JBG/AAL/PIA Capiz)