TAGBILARAN CITY, Bohol, July 14 (PIA) -- Gi-awhag ni Philippine Information Agency Central Visayas Regional Director Fayette Riñen ang mga public information officers (PIOs) sa national government agencies ug local government units sa Bohol nga mahimong responsable ug aktibo sa pagpakatap og impormasyon nga importante kaayo.

“It is high time we do our share and swamp the digital spaces with relevant information. Let’s be proactive in disseminating information that really matters, which is information for change and development (Panahon na nga buhaton nato ang atong bahin ug bahaan ang ‘digital spaces’ og mga mahinungdanong impormasyon. Mahimong aktibo kita sa pagpakatap sa impormasyon nga importante kaayo, kanang impormasyon nga alang sa kabag-ohan ug kalamboan),” matud pa ni Riñen.

Mihangyo og suporta ang PIA7 RD sa mga PIOs atol sa Association of United Development Information Officers (AUDIO) General Assembly niadtong Hulyo 20 nga gipahigayon sa Bohol Public School Teachers and Employees Association (BPSTEA) Function Hall sa syudad sa Tagbilaran.

Katambayayong na sa PIA ang AUDIO-Bohol kaniadto pa sa pagsunod sa mandato niini sa paghatod og tukma sa panahon, may kalabotan ug mahinungdanong impormasyon kalabot sa mga programa, proyekto ug mga serbisyo sa gobyerno.

Gitumbok ni Riñen ang kritikal nga papel sa mga PIOs sa pagpakatap sa mga impormasyon paubos ngadto sa grassroots level.

Gi-presentar usab sa PIA7 chief ngadto sa mga PIOs ang "Maayong Balita sa Central Visayas," usa  ka senemanang online program nga gimugna sa PIA7 nga makita ug madungog matag adlaw’ng Sabado diin kabahin sa mga maayong balita gikan sa upat ka probinsya sa rehiyon ang hisgotan.

Ang PIA7 personnel, kauban sa PIA-Bohol Infocen staff ug mga miyembro sa AUDIO-Bohol nipahigayon sa ilang courtesy visit ngadto kang Bohol Governor Erico Aristotle Aumentado niadtong Hulyo 20 sa buntag.

Si Aumentado mipasalig kang Riñen sa iyang “full support” sa information dissemination initiatives sa PIA.

Nisanong usab si Aumentado sa hangyo sa paghtag og libreng luna sa opisina alang sa PIA-Bohol Infocen.

Ang AUDIO-Bohol atol sa ilang courtesy visit niduso ngadto sa gobernador sa ilang AUDIO-Bohol Resolution No. 01 Series of 2022, usa  ka resolusyon nga mainitong naghangyo kang Aumentado, pinaagi sa Sangguniang Panlalawigan sa paghatag og libreng luna sa opisina sa PIA Bohol Infocen sa Old o New Provincial Capitol Building o bisan asang building nga gipanag-iya sa probinsyal nga kagamhanan sa Bohol.

Ang PIA ang nagdumala sa AUDIO-Bohol, usa ka hugpong nga rehistrado sa Securities and Exchange Commission.  (ECB/PIA7 Bohol)