CEBU CITY, Cebu, July 15 (PIA) -- Subay sa kasaulogan sa World Population Day niadtong Hulyo 11,  mas gipahingusgan ang pagpatuman sa Commission on Population and Development Region 7 (POPCOM7) ang ilang mga programa ug serbisyo alang sa lig-on nga pagdumala ug pag kontrol sa populasyon sa tibuok rehiyon sa Central Visayas.

Nagsagop sa tema nga “A world of 8 billion: Towards a resilient future for all - Harnessing opportunities and ensuring rights and choices for all” ang maong selebrasyon nagtumong sa paghatag ug gibug-aton sa kamatuoran nga kinahanglan masabtan sa katawhan ang importansya sa pag konsiderar sa aspeto sa populasyon sa pagpatuman sa tanang mga proyekto ug programa alang sa kalambuan sa nasud.

Kabahin niini, ang POPCOM7 nagpadayun karon sa ilang kalihokan sama sa pag hatod sa ilang flagship program sama sa Responsible Parenthood and Family Planning Program pinaagi sa abag sa DOH.

Ang ahensya subsub usab ang pagtubag sa isyu sa teenage pregnancy pinaagi sa pag paghatag sa mga teenager sa saktong impormasyon aron nga malikayan kini nga problema.

Gihugtan usab ang pagpatuman sa mga programa kabahin sa Adolescent Health and Development pinaagi sa pagkig-alayon sa mga nagkadaiyang LGUs sa Rehiyon 7.

Samtang subsub usab ang ilang pag edukar sa mga kababayen-an ug mga magtiayon kabahin sa gidaghanon sa ilang mahimung mga anak nga kini i-angay lang sa ilang pinansyal nga kapasidad isip mga ginikanan.

Matod sa POPCOM7, ang replacement fertility rate dinhi sa nasud o ang ideal nga gidaghanon sa anak anaa ra sa duha matag magtiayaon kini aron dili mabug-atan ang ekonomiya tungod sa padayun nga pagtaas sa populasyon.

“In order to manage the growth of our population we are continually doing our part as mandated by law being the agency nga maoy motanaw para sa pag manage sa atong population para sa atong nasud,” kini saysay ni POPCOM7 Regional Director Atty. Bruce Ragas, atol sa iyang pag guest sa programang KASAYURAN niadtong Hulyo 13.

Sa pagkakaron, ang populasyon sa tibuok kalibotan miabot na sa 8 ka bilyon kung diin anaa sa 110 ka milyon niini ang anaa sa Pilipinas.

Gidugang usab sa ahensya nga ang populasyon sa Central Visayas anaa sa 8,081,998 kung diin ang labing daghan kay ang Cebu Province nga anaa sa 3,325,385, kini nga numero gikuha gikan sa uwahing census nga gipahigayon niadtong tuig 2020.

Giasoy sa POPCOM7 nga pinakadakong problema anaa sa economic opportunities sa matag pamilya kung diin ang kakabos mao ang nakita nga labing unang hinungdan sa pagdaghan sa populasyon.

“The bottom line problem that we are facing is not the number of population, ang atong problem gyud is poverty which is a contributing factor why we are having this big population that requires a whole of government approach and to address this we should focus on providing education and other social services," pagpahinapos ni Ragas. (RGC/PIA7)