SYUDAD SANG ROXAS, Capiz (PIA) -- Nagtipon ang mga kilala nga kapehan sa probinsya sa SM City Roxas Event Center diri sa Roxas City humalin Hulyo 25 tubtob Hulyo 31 agud nga magtanyag sang nagkanari-sari nga timpla kag porma sang kape para sa mga mahilig mag-inom sini.

JD's Gourmet, Flat White, Gabriel’s Catering and Services, Istorya kag Jo’s Coffee nga ginakabig mga "pop-up coffee shops" nga natukod sa syudad kag probinsya bangud sang hilig sa kape sang mga nagapanag-iya sang kapehan.

Nahibaluan nga ang iban nga kapehan ang natukod naman bilang oportunidad agud makabangon sa krisis bangud sang pandemya.

Matandaan nga kapin 1,200 ka mga puno sang robusta nga variety sang kape ang gintanom sa coffee techno demo farm sa Brgy. Mianay sa banwa sang Sigma sang tuig 2020 agud nga magserbe nga tulun-an nga lugar sa produksyon sang robusta nga kape sa probinsya.

Ang inisyatibo pinaagi sa pagbinuligan sang Technical Education and Skills Development Authority, Department of Agriculture kag lokal nga panguluhan sang Sigma ang nagatuyo nga mangin "coffee capital" sang rehiyon ang probinsya. (JBG/AAL/PIA Capiz)