TAGBILARAN CITY, Bohol, July 28 (PIA) -- Gihikyad ni Presidente Ferdinand “Bongbong” Marcos Jr. ang nikabat sa napulog siyam (19) ka prayoridad nga balaodnon nga matud pa daku og matabang sa pagbangon sa ekonomiya nga kinahanglan sa unom ka tuig nga pagdumala sa iyang administrasyon.

Sa labing unang State of the Nation Address (SONA) ni Pangulong Marcos Jr., gihangyo niini sa Kongreso nga mahatagan og prayoridad ang maong mga balaodnon.

Nag-una na niini ang pagbaton og balaod alang sa National Government Rightsizing Program nga usa ka mekanismo sa reporma nga nagtinguha sa pagpauswag sa institusyonal nga kapasidad sa gobyerno sa pagbuhat sa iyang mandato ug paghatag ug mas maayong serbisyo, samtang pagsiguro sa labing maayo ug episyente nga paggamit sa mga kahinguhaan.

Gihangyo sa Presidente nga mapalabang ang Budget Modernization Bill nga nagtinguha nga ma-institutionalize ang Cash-based Budgeting System (CBS) ubos sa Executive Order No. 91, Series 2019 aron mapalig-on ang disiplina sa panalapi sa alokasyon ug paggamit sa mga kahinguhaan sa badyet pinaagi sa pagsiguro nga ang matag peso nga gibadyet sa gobyerno modala ngadto sa aktuwal nga paghatod sa mga programa ug proyekto.

Naglaom usab ang Pangulo nga sa pakigtambayayong sa Kongreso, makatukod ang Pilipinas og kaugalingong Center for Disease Prevention and Control nga ubos sa Department of Health.

Apil na usab ang pagtukod og usa  ka vaccine institute.

Gusto usab sa Pangulo nga magtukod og mga specialty health centers ug clinics nga dalhon sa mga probinsya.

Ang uban pang balaodnon nga gihangyo ni Presidente Marcos Jr. nga mapalabang mao ang Department of Water Resources, National Defense Act ug ang Mandatory Reserve Officers Training Corps (ROTC) ug pag-amyenda sa pipila pang balaod sama sa Electric Power Industry Reform Act o EPIRA law of 2001 ug Republic Act 6657 o ang Comprehensive Agrarian Reform Law. (ECB/PIA7 Bohol)