TAGBILARAN CITY, Bohol, July 29 (PIA) -- Ang Bohol Provincial Police Office (BPPO) nakadawat og triple nga kadaugan atol sa Police Regional Office (PRO 7) Culminating Rites alang sa ika-27 nga kasaulogan sa Police Community Relations Month nga gipahigayon sa Camp Sergio Osmeña sa dakbayan sa Sugbo, Hulyo 29, 2022.
Midaog ang Tagbilaran City Police Station isip Best City Police Station alang sa PCR samtang napili ang Cortes Municipal Police Station isip Best Municipal Station alang sa Police Community Relations.
Nakuha usab ni kanhi Tagbilaran City Police Station Chief PLtCol Mary Crystal B. Peralta ang Most Outstanding Junior Police Chief Officer alang sa Police Community Relations.
Si kanhi Tagbilaran City Mayor John Geesnell “Baba” Yap II ang personal nga midawat sa maong pasidungog uban sa bag-ong gitudlo nga si Police Chief PLtCol Regie Real nga maoy nirepresentar sa Tagbilaran City Police Station atol sa awards rites.
Kahinumdoman nga ubos sa administrasyon ni Yap, usa ka lig-on nga panag-uban ang namugna tali sa dakbayan ug kapolisan nga miresulta sa mas epektibong pagpatuman sa balaod ug mas maayong relasyon sa kapolisan ug komunidad.
Sa iyang keynote message alang sa Police Regional Office 7 nga gipangulohan ni PBGen Roque Eduardo DP Vega, si Atty. Beatrice Aurora A Vega-Cancio, Commissioner sa National Police Commission (NAPOLCOM) miila sa mga paningkamot sa tibuok pwersa ug sa samang higayon, nagdasig kanila sa pagpadayon sa pakigtambayayong sa komunidad alang sa tinuod nga epektibo ug episyente nga pagpatuman sa balaod.
Ang Police Community Relations usa ka mahinungdanon nga parte sa pagpatuman sa balaod. Kini gitumong alang sa mas lig-on nga panagtambayayong tali sa kapolisan, komunidad ug mga stakeholders pinaagi sa mga aktibidad ug programa nga nagpasiugda sa pagsalig ug pagtinabangay sa usag-usa.
Ang kasaulogan sa ika-27 nga Police Community Relations Month karong tuiga nagdala sa tema nga "Ugnayang Pulisya at Komunidad Tungo sa Mapayapa, Maayos, at Maunlad na Pamayanan. (ECB/PIA7 Bohol)
