ABRA (PIA) -- Bumuhos ang tulong mula sa pamahalaan at iba't ibang sektor para sa mga naapektuhan ng malakas na lindol na yumanig sa Hilagang Kanlurang Luzon nitong Hulyo 27, 2022.

Agarang nagpadala ng augmentation ang Philippine National Police, Armed Forces of the Philippines, Bureau of Fire Protection, at iba pang sangay ng pamahalaan upang tumulong sa clearing and relief operations. Pinangunahan naman ng Department of Public Works and Highways ang pagbubukas sa mga saradong kalsada dahil pa rin sa pagguho ng lupa at malalaking bato.

Sa utos ni Pangulong Ferdinand Marcos Jr., patuloy na isinasagawa ang relief operations sa Abra. Gamit ng Philippine Air Force ang limang air assets nila, naipadala ang mga food packs mula sa Department of Social Welfare and Development (DSWD) sa mga na-isolate na bayan ng Boliney, Bucloc, Daguioman, Luba, Tubo, Malibcong, at Lacub. Agad ding nadeliber ang mga relief packs sa mga apektadong pamilya sa iba pang mga bayan ng Abra.

Ang mga nasugatan at nawalan ng mahal sa buhay, binigyan ng pamahalaan ng cash assistance sa pamamagitan ng DSWD Assistance in Crisis Situation program. Ang mga benepisyaryo ay sumailalim sa assessment ng Department of Health. Nabigyan din ng tulong pinansiyal ang mga nasiraan ng bahay.

Ang TESDA Abra Provincial Office, namahagi rin ng food packs sa mga apektadong residente.

Bilang tugon naman sa pangangailangan ng temporaryong tirahan, nagpadala ang United States Agency for International Development (USAID)-Bureau for Humanitarian Assistance at International Organization for Migration Philippines ng shelter-grade tarps sa lalawigan. Nagsagawa na rin ng ocular inspection ang mga kawani ng Department of Human Settlements and Urban Development sa mga nasirang istruktura.

Ang Overseas Workers Welfare Administration - Cordillera naman, nagsagawa ng assessment kaugnay sa kalagayan ng mga Overseas Filipino Workes sa Abra na naapektuhan ng lindol. May ilang OFWs na ginawaran na ng ahensiya ng tulong.

Sa kasagsagan ng trahedya, umiral ang pagkamakatao ng karamihan. Ilang establisyemento ang namigay ng libreng tubig at pagkain. Libreng tubig ang inihatid ng Metro Bangued Water District sa mga apektado. Ang Manila Water District, naglunsad ng mobile water refilling sa ilang bayan. Patuloy ding umiikot ang Metro Manila Development Authority (MMDA) upang magbigay ng purified drinking water sa mga residente. Ang mobile kitchen naman ng BFP-NCR, naghain ng libreng pagkain sa mga residente.

Mula sa Benguet, ibiniyahe ng dalawang KADIWA trucks ng Department of Agriculture - Cordillera ang mga gulay sa anim na bayan ng Abra kung saan, ibinenta sa mababang presyo ang iba't ibang mga gulay. Dinala rin sa Bangued ang Kadiwa on Wheels kung saan, ibinenta sa mga residente sa murang presyo ang bangus, manok, cooking oil at iba pang condiments.

Sa pinakahuling pahayag ni Pangulong Marcos, sinabi nito na ang pagbuhos ng tulong sa Abra at sa iba pang naapektuhan ng lindol ay sumasalamin sa pagka-Pilipino na likas na matulungin.

"Gaya ng mga iba pa nating linampasang pagsubok, tiyak na hindi tayo magpapatinag dito sa nakaraang trahedya. Mag-ingat po tayong lahat at laging tandaan, sa anumang atin pang haharapin, ang diwa ng ating pagka-Pilipino ay mananatiling maningning," ani Pangulong Marcos.

Upang maibsan ang panganib mula sa mga nasirang istruktura, ipinag-utos ang paggiba sa mga nasirang gusali sa Bangued. Tumulong ang mga kawani ng MMDA sa demolisyon at clearing operations.

Nasa lalawigan din ang mga engineers mula sa Association of Structural Engineers of the Philippines at Philippine Institute of Civil Engineers upang magbigay ng suporta sa structural assessment sa mga naapektuhan ng pagyanig.

Sinimulan na rin ng Department of Science and Technology - Philippine Institute of Volcanology and Seismology ang reconnaissance survey sa earthquake geologic impacts at damage assessment sa probinsiya. Ang resulta ng survey ay ipapaalam sa mga pamahalaang lokal para sa pagpapatupad nila ng epektibong recovery plans.

Sa ngayon ay patuloy na nakabantay ang mga kasapi ng Cordillera Regional Disaster Risk Reduction and Management Council (CRDRRMC) at iba pang opisina ng pamahalaan sa mga kaganapan sa Abra lalo na at nararamdaman pa rin ngayon ang aftershocks ng magnitude 7 na lindol.

Naglabas din ang CRDRRMC ng resolusyon na humihikat sa mga pamahalaang lokal at regional line agencies/uniformed services na tumulong sa kasalukuyang disaster management and relief operations sa Abra.

Sa pinakahuling ulat ng DSWD-CAR, lima ang nasawi habang 272 ang nasugatan sa lalawigan ng Abra. Nasa 12,593 na pamilya o 45,596 katao ang lumikas. Ang mga totally damaged houses ay nasa 282 habang ang mga partially damaged ay 21,081. (JDP/DEG-PIA CAR)