TAGBILARAN CITY, Bohol, August 5 (PIA) -- Nanawagan si Department of Interior and Local Government (DILG) Kalihim Benjamin “Benhur” Abalos Jr. sa mga mayor ug gobernador sa pagtabang nga mapalig-on ang Barangay Anti-Drug Abuse Councils (BADACs) sa ilang nasakupan.
Matud pa sa Kalihim nga ipadayon sa administrasyon ni Presidente Ferdinand “Bongbong” Marcos, Jr. ang kampanya batok sa ilegal nga droga.
“Humihingi po ako ng tulong about illegal drugs. We will intensify the war on drugs, and we will start at the grassroots. So please, I am requesting you to harness the capability and strengthen your BADACs (Nangayo kog tabang bahin sa ilegal nga drugas. Atong hingosgan ang gubat batok sa droga, ug magsugod kita sa grassroots. Busa palihug, gihangyo ko kamo nga gamiton ang katakus ug palig-onon ang inyong mga BADAC,” hangyo pa ni Abalos.
Gidugang pa sa Kalihim nga kritikal ang papel sa BADAC sa whole-of-government approach aron mapugngan ang pagkatap sa mga ilegal nga droga sa komunidad.
Nanawagan si Abalos sa mga gobernador ug mayor nga siguruhon nga ang atong mga BADAC maayo nga naglihok ug nakatabang sa pagprotekta sa mga komunidad batok sa ilegal nga droga ug mga tigpakatap niini.
Apil sa mga responsibilidad sa BADAC ang pagtumbok sa mga drug-affected areas; pagmugna og BADAC Plan of Action; pag-andam sa mga barangay tanod ug BADAC Auxiliary Team sa ilang katungdanan; pag-asister sa mga tawo nga tiggamit og ilegal nga droga sa pagsurender sa Barangay Rehabilitation and Referral Desk; ug pagtutok sa mga indibiduwal nga nipaubos sa Community-Based Rehabilitation Treatment.
Giseguro ni Abalos nga bukas ang linya sa ilang buhatan sa tanang lokal nga opisyal aron mahimong epektibong tulay tali sa nasudnon ug lokal nga kagamhanan. (ECB/PIA7 Bohol)
