TAGBILARAN CITY, Bohol, August 1 (PIA) -- Nagpabilin ang Distrito sa Cabawan nga wala mamantsahi ang ilang record sa mga nasakit sa dengue, dinhi sa Tagbilaran City gikan sa Enero ngadto na sa Hulyo 28.

Segun sa taho nga gipaambit ni City Health Office Information Officer Robin Culpa, sukad sa pagsugod sa tuig hangtud sa Hulyo 28, mikabat na sa 148 ang natala ug kompirmado nga kaso sa dengue dinhi sa syudad sa Tagbilaran.

Taas man ang natala nga kaso sa syudad sa Tagbilaran City, nalipay pa gihapon sila tungod kay sa kalooy sa Ginoo, walay tawo nga namatay tungod sa nahisgutang sakit.

Ang dengue, madala sa kagaw nga anaa sa lawas sa lamok nga aedes egypti ug albopictus, kasagaran niini may puntikpuntik ang color ug paborito niining hugpanan ang mga ngitngit nga lugar sa balay lakip na ang mga kortina, hinayhay ilabi na kon medyo umog ug mga lugar nga kaitlogan sama sa napundo nga tubig.

Kasagaran usab niini nga mga lamoka, mamaak sasayong hapon ug sa sayong buntag, hinungdan nga maayo gyud nga sundon ang naaandan nga 4 o’clock habit kanus-a himoon ang search and destroy, pagseguro sa kaugalingon nga panalipod sa pinaakan, pagpatan-aw sa ospital kon may gibati ug  ang pag-paaso kon gikinahanglan.

Sa Tagilaran, labing daghang natala nga kaso sa dengue ang Dao ug ang Mansasa nga parehas nga miabut na sa 23 ka tawo ang nasakit sa dengue.

Ikatulo ang Cogon nga ma18 na ka natala nga kaso, ug gisundan sa Bool nga may 17 ka kaso.

Ikaupat ang Poblacion III nga mingtala na og 15 ka tawo nga nasakit sa dengue, ug gisundan usab sa Dampas nga may 10 ka kaso.

Sa susamang mga panahon, ang Booy ug ang Poblacion 2 parehas nga may tag 7 ka kaso samtang ang  parehas usab nga may 6 ka kaso ang Poblacion 2 ug ang Tiptip.

Lima na usab ang nasakit sa dengue sa San Isidro samtang parehas sa nga may tulo ka pasyente na ang Manga ug Ubujan.

Duha na usab ka kaso sa dengue ang gikan sa Taloto. (RAHC/PIA7 Bohol)