TAGBILARAN CITY, Bohol, August 1 (PIA) -- Mokabat sa P16 Milyones ang pundo nga giluwatan sa Philippine Carabao Center aron pagpabarug ug pagpalig-on sa mga gikinahanglang imprastraktura sa pagpalig-on sa panggatasan sa Bohol.

Atul sa ika unom nga Bohol Milk Festival, gitunol ni Dr. Caro Salcez, kanhi hepe sa PCC Ubay Stock Farm ug kasamtangan nga Deputy Executive Director sa PCC, ang symbolic nga timailhan sa P5 milyones nga gambalay nga maoy pasilongan sa pasilidad sa pagproseso sa gatas sa kabaw ngadto sa mga opisyales sa Bohol Dairy Industry.

Matud ni Dr. Salcez nga ang tukoron nga pasilidad alang sa BODACO, adto mobarug sa barangay San Pascual sa lungsod sa Ubay.

Sa laing bahin, gitunol usab ni Dr. Salcez ang P11 milyones nga pundo sa pagpahiuli ug pagpaayo sa PCC Ubay Stock Farm Training Center ug Milk Processing Facility nga anaa sa Lomangog Ubay.

Ang pagtugyan gisaksihan ni Gob Aristotle Aumentado, DA Regional Executive Director Joel Elumba, mga  opisyales sa BODACO ug mga opisyales sa PCC Ubay panangulohan ni Dr. Dinah Loculan. 

Kahinumduman nga si Dr. Salces, sa iyang panahon sa PCC Ubay Stock Farm, amoy nagpasugod nga buksan ang Ubay Stock Farm sa agri tourism, bisan pa an gang nasud, kamolo pa og panday sa balaod kabahin niini.

Gilantaw sa PCC ang USF nga mamahimong sentro sa farm o agri-tourism tungod sa kamahinungdanon usab sa mga pasilidad dinhi nga maoy nagseguro sa malungtarong pagkaon.

Niadtong panahona, ang tour Ubay Stock Farm maglangkob unta sa kasinatian sa floating restaurant didto sa Capayas Dam, sa paggatas sab aka ug kabaw nga mahimonga dto himoon sa PCC ug sa National Dairy Authority, ang pag-aninaw sa mga nindtot nga  talan-awon ibabaw sa Philippine Coconut Authority Demonstration Farm, pagpamingwit didto sa PCA impounding, ug  ang horseback riding uban sa mga cowboys sa USF.

Sa panahon usab ni Dr. Salcez napamatud-an ang kasaligan nga bili sa pagpang gatasan nga mahimong magdugang sa kapanginabuhian sa mga mag-uuma nga nag-alima sa mga hayupan.

Sa usa ka bisaya nga kabaw nga gatasan, gawas sa nati nga ihatag niini, may makuna nga 2 ka litro nga gatas nga magamit sa Bohol sa iyang programang pangnutrisyon.

Mas  monindot pa gani ang sitwasyon kon ang kabaw nga gatasan, cross bred o hybrid kay moabut pa sa 12 ngadto sa 14 ka litros nga gatas ang makuha.

Ang PCC mao ra usab ang mopalit sa mga gatas, sa tag P50 ang litro, kay ang PCC ug ang NDA pa lamang ang may kaugalingong  Milk Processing Facility nga mapasteurize sa gatas aron dili kini dali madaut ug mahimong kuhaan sa mga by-products sa gatas sama sa keso, yoghurt, ug tag-as nga kalidad sa keso nga gamiton sa mga mahalong pagkaon. (RAHC/PIA7 Bohol)