DIPOLOG CITY, Aug. 11 (PIA) - Bug-os nga mihangyo sa pakighiusa sa tanang Local Government Unit ug ahensyang pang gobyerno si Department of Health Region IX OIC- Director IV Joshua G. Brillantes, sa gilusad nga kampanyang PINASLAKAS, ubos sa administrasyon ni President Ferdinand 'Bongbong' Marcos Jr., sa gipahigayong hamubong programa dinhi sa dakbayan sa Dipolog, ning probinsya sa Zamboanga del Norte.

Kahibaloan nga usa kini ka lakang pang gobyerno isip pagpakusog sa kampanya nga magpabakuna batok sa COVID-19, diin target niini nga mabakunahan ang 90% ning nasud sa sulod sa 100 ka adlaw, labi na ang mga senior citizen.

Sa iyang mensahe subli niyang gihangyo ang mayores sa mga siyudad ug munisipalidad, ug opisyales sa kabarangayan nga maghiusa sa tinguha ug panglantaw, maadtuan ang tanang kabarangayan alang sa pagbakuna, aron malikay sa maong sakit nga makamatay.

Matud kang RD Brillantes, napamatud-an na nga mamahimong lig-on ang usa ka kampanya kung aduna'y pakighiusa ang tanan, busa nanghinaut siya nga ang kusog nga gipabati sa tagsa-tagsa ug nagkalainlaing ahensya sa nakalabay'ng pakigbisog, makita sab karon sa kampanya.

Gidasig usab ni Brillantes ang bag-ong administrasyon sa probinsya ubos sa pagdumala ni Gov. Rosalina 'Nene' Jalosjos, nga mapataas pa ang serbisyo sa tambalanan.

Dugang niyang gidasig ang mga LGU labi na ang kagamhanang probinsyal diin manguna sa pagpatuman sa mga health program sa probinsya, magbaton ug executive order nga nagtugot sa Provincial Health Office nga manguna sa maong kampanya, ingon sab pagpadala sa mga personahe alang sa monitoring aron masiguro nga naipatuman kini ug ila sab nga nakab-ot ang ilang mga target.

Nanghinaut sab siya nga ibalik ang kanhing pamaagi sa pagsulod sa mga establisemento, bisan sa pagsakay sa pampublikong transportasyon, diin kinahanglan aduna'y mapakitang vaccination card.

Sa laing bahin, iyang gipasidunggan ang tanan ilabi na ang mga local vaccine operation sector kay nakab-ot ang 70 million target, sa nakalabay'ng administrasyon ni kanhi President Rodrigo R. Duterte, diin mapasalamaton siya sa maong administrasyon gumikan sa gipabati nga maiiniton niining pag-aghat sa publiko nga magpabakuna. (RVC/EDT/LMR-GIP/PIA9-Zamboanga del Norte)