BAGUIO CITY (PIA) -- Sinimulan na ng pamahalaang panlungsod ng Baguio ang pag-update sa Comprehensive Land Use Plan (CLUP) at Comprehensive Development Plan (CDP) nito sa pamamagitan ng Characterization and Analysis Seminar Workshop mula Agosto 10-12, 2022.
Ayon kay Elias Aoanan ng City Planning and Development Office, layunin ng aktibidad na malaman ang mga isyu, potensiyal at development needs ng lungsod sa hinaharap.
"This will answer the question 'where we are now?' We can further answer this question by identifying and updating our baseline data, in order to assess the existing socio-economic, physical, environmental characteristics of the city," ani Aoanan.
Makatutulong din aniya ito upang malaman ang mga pangangailangan, isyu, at alalahanin na mareresolba sa pamamagitan ng CLUP at mga oportunidad upang makamit ang mga hangarin ng lungsod.
Kabilang sa mga tinalakay ang kalahagahan ng demographic, economic, infrastructure, at sectoral studies.
Inihayag ni Arilda Felix ng Department of Human Settlements and Urban Development ang magiging basehan ng lebel ng pangangailangan para sa public services, upang malaman ang kasalukuyang kalagayan at growth pattern ng ekonomiya at makamit ang sustainable development.
Nakibahagi sa aktibidad ang mga miyembro ng multi-sectoral technical working group ng City Planning Team.
Isasagawa ang serye ng aktibidad para sa CLUP at CDP hanggang sa maisumite ang mga ito para sa adoption at approval ng lokal na konseho sa Disyembre ngayong taon. (JDP/DEG-PIA CAR)
