LUNGSOD NG CALAPAN, Oriental Mindoro (PIA) -- “Inaatasan ko si Bokal Ahop Agate, ang Indigenous People Mandatory Representative (IPMR) sa Sangguniang Panlalawigan na siyang magpapalakas sa sektor ng mga katutubo sa ating lalawigan ngayong tatlong taon na ang aking termino."

Ito ang binigyang-diin na mensahe ni Gob. Humerlito ‘Bonz’ Dolor matapos makapanumpa kamakailan bilang gobernador para sa ikalawang termino ng panunungkulan na ginanap sa Bulwagang Panlalawigan sa Kapitolyo kamakailan.

Ibinahagi ni Dolor noong siya ay bise gobernador pa ng magkakaroon ng taunang pondo ang IPMR sa sangguniang panlalawigan hanggang sa siya ay naging punong lalawigan, kung kaya ang mensahe nito kay Agate ay gamitin ng wasto sa mga programa at proyekto na nakalaan para sa mga kapwa niya katutubo.

“Sa bilang at datos ng Philippine Army at Philippine National Police, ang may pinaka maraming kapatid na nai-ingganyong lumaban sa pamahalaan ay mga katutubo, dahil sila’y tunay na napapabayan minsan ng pamahalaan,” ayon kay Dolor.

Dagdag pa nito, “kaya aniya may IPMR dahil ang 10% ng populasyon ng lalawigan ay kinabibilangan ng mga katutubong Mangyan kaya marapat lamang na ang 10% nito ay manggagawang katutubo.”

Dahil dito ay pagpupursigihan ng pamahalaang panlalawigan na mabigyan ng magandang kalidad na edukasyon ang naturang sektor para sa hinaharap ay mapabuti ang kanilang buhay upang maging ‘Zero Illiteracy’ sa darating na taong 2028. (DN/PIA-OrMin)