DIPOLOG CITY, Aug. 18 (PIA) - Duyog sa pagsaulog sa ika-28 nga anibersaryo sa Technical Education and Skills Development Authority (TESDA) dinhi sa Rehiyon IX, ning bulan sa Agosto, gipahigayon ang tulo ka adlaw nga Regional Skills Competition isip highlight sa kasaulogan, dinhi sa Dipolog School of Fisheries, Olingan, Dipolog City, Zamboanga del Norte.

Gikan pa sa probinsya sa Zamboanga del Sur, Zamboanga Sibugay, Isabela City, ug niining probinsya ang misalmot sa maong aktibidad, diin gilangkuban sa 16 ka mga competitor ug 16 sab ka mga expert.

Kahibaloan, aduna kini 16 ka skills competition area sama sa cooking, restaurant service, bakery, welding, refrigeration, electrical, electronics, visual graphic design, plumbing/ heating, carpentry, tiling, prototype modeling, hairdressing, hotel reception, fashion technology, ug renewal energy.

Nasayran gikan kang Engr. Alan T. Bacatan, ARD/ Zamboanga del Norte Provincial Director, gawas sa ganti ug medalya nga madawat, murepresenta sab sa Philippine National Skills Competition ang mananaog niini nga kompetisyon.

Dugang sab niini, gitakda nang salmutan sa Rehiyon IX ang International Skills Competition 2022, sa Germany alang refrigeration and air conditioning, karong Oktubre 5-15; samtang ipahigayon sab sa Switzerland ang alang sa graphics design karong umalabot Oktubre 7-17, 2022.

Gipasigarbo sa TESDA si Marty B. Bastasa gikan ning rehiyon ug taga Sindangan, nga consistent Gold Winner alang sa refrigeration and air-conditioning, sulod sa tulo ka managsunod nga katuigan, ug misalmot sa nakalabay'ng World Skills Competition sa Kazan, Russia, kaniadtong Agosto 2019.

Sa mensahe ni TESDA IX Regional Director Dan M. Navarro, nanghinaut sila nga labaw pang mailhan sa katawhan ang TESDA, ug makita nga dako kini ug ikatabang isip tinubdan sa panginabuhian, aron muuswag ang kahimtang labi na sa mga naglisod. Sanglit mao man kini ang ilang mandato, nga mapauswag ang kahanas sa katawhan aron magamit nila sa kalambuan.

Sila nangagpas nga dili lang kutob kang Marty, maaghat pa unta ang mga kabatan-unan nga himuslan ang daghang programa sa TESDA. (EDT/LMR-GIP/PIA Zamboanga del Norte)