Bilang suporta sa kampanya it nasyonal nga gobyerno nga ginatawag nga “PinasLakas” ag sa handum it probinsya nga mapataas ro numero it mga Aklanon nga makabaton it booster shots para mamentinar ro wall of immunity it Aklan, ro PHO-Aklan gindaea ro vaccination sites sa mga opisina ag mga establisemyento.
Primiro nga ginhiwat ro COVID-19 mobile vaccination ku Agosto 4, 2022 sa lobby it Aklan Provincial Capitol. Ro mga empleyado ag kliyente it kapitolyo hay nakabaton it bakuna kontra COVID -19.
Ro mga opisina ag establisemyento nga nakapanipueos eon it on-site vaccination hay ro Aklan Police Provincial Office, Metro Kalibo Water District ag Filbake Food Corporation.
Ku Agosto 24, hay natigayon ro mobile vaccination sa Bureau of Jail Management and Penology (BJMP) – Aklan; kung siin ro mga staff ag ro 154 nga mga Persons Deprived of Liberty (PDL) hay nabakunahan it primary ag booster doses it COVID-19 vaccine.
Gina-engganyo it PHO-Aklan ro mga opisina ag mga establisyemento sa probinsya it Aklan nga agumon ro mobile vaccination program para padayon nga mangin protektado kontra coronavirus. Ro mga interesado hay magregister anay sa tinyURL.com/PinasLakasMobile ag hueaton ro tawag halin sa PHO-Aklan para sa kumpirmasyon.
