TAGBILARAN CITY, Bohol, August 31 (PIA) -- Gitakda sa Commission on Elections (Comelec) ang filing period sa Certificate of Candidacy (COC) alang sa mga gustong modagan sa nagsingabot nga Barangay ug Sangguniang Kabataan Elections (BSKE) gikan Oktubre 6 hangtod 13, 2022.

Base sa Calendar of Activities niini, ang panahon sa pagduso modagan lamang og 6 ka adlaw tungod kay ang Oktubre 9, adlaw man nga Domingo, nga dili kauban sa aktibidad.

Ang mga aspirante sa barangay ug mga kabataang botohan mahimong moduso sa ilang COC sa Office of the Election Officer (OEO) sa ilang lungsod o munisipalidad.

Ang petsa sa filing period sa COC nakalatid sa Section 7 sa Republic Act 6679 kalabot sa Section 29 sa Republic Act 6646.

Nakalatid sa Section 7 nga walay bisan kinsang tawo ang mahimong angayan alang sa bisan unsang posisyon sa barangay gawas lamang kun nagduso og sworn certificate of candidacy sa election registrar sa lungsod o munisipalidad nga gipuy-an niini sa dili moubos sa 10 ka adlaw sa dili pa ang adlaw sa piniliay.

Ang porma ug nahisulod sa sertipiko sa kandidatura angay itakda sa Comelec.

Ang panahon sa kampanya angay nga 10 ka adlaw sa dili pa ang piniliay.

Magsugod ang panahon sa piniliay alang sa mga botohan sa Disyembre 5 gikan Oktubre 6 hangtod Disyembre 12, 2022.

Magsugod ang campaign period sa Nobyembre 25, 2022 hangtod Disyembre 3, 2022.

Ang oras sa pagbotar magsugod sa alas 7 sa buntag hangtud sa alas 3 sa pales sa adlaw sa piniliay. (ECB/PIA7 Bohol)