LUNGSOD NG CALAPAN, Oriental Mindoro (PIA) – Matapos maglaban-laban sa pitong larangan ang nasa humigit-kumulang 50 kalahok mula sa rehiyon para sa provincial level ng Provincial Skills Competition ng Technical Education and Skills Development Authority (TESDA) Mimaropa, 13 na lamang ang natirang nagtatagisan ng talino para sa Regional Skills Competition (RSC) sa loob ng dalawang araw na kompetisyon na ginanap sa Simeon Suan Vocational and Technology College (SSVTC) sa bayan ng Bansud kamakailan.

Sa naturang kompetisyon, ang mga larangan na sinalihan ng mga kalahok kasama ang kanilang mga coaches na nagmula sa 12 paaralan na may akreditasyon ng TESDA ay ang fashion technology, cooking, electrical installation, restaurant services, bakery, welding at automotive technology.

Dahil naman sa iisa ang kalahok na nagwagi sa provincial level sa larangan ng pagluluto na si Alona Jane Malicsi, fashion technology na si Joyce Restua at Cleford John Manuel para sa restaurant services na lahat ay nagmula sa Oriental Mindoro, otomatiko na sila ay susulong sa susunod na kompetisyon sa National level para sa National Skills Competition.

Samantala, sa pagtatapos ng RSC na siyang susulong para sa National Skills Competition ay si Jombee Ramos ng Marinduque para sa kategoryang Electrical Installation kasama ang sumungkit ng ikalawang pwesto na si Joshua Almarez mula sa Oriental Mindoro at ang pumangatlo ay si Abner Jimenez, Jr. na nagmula sa Palawan.

Sa larangan ng Automobile Technology, tinanghal na kampeyon ang taga Romblon na si James Patrick Meren at pumangalawa ay si Justin Ed Pestaño ng Oriental Mindoro habang sa welding ay ibinulsa ni Arvin Jay Mendoza ng Oriental Mindoro ang unang pwesto na sinundan ni Jonvie Marquina na mula sa Romblon.

At panghuli ay sa larangan ng Bakery na pinangunahan ni Archear Obligar mula Palawan na sinegundahan ni Nikko Vien Habigo ng Marinduque at Yllona Jane Ylagan na galing Oriental Mindoro.

Malugod na pagbati ang ipinaabot ni TESDA Mimaropa Regional Director Rosalina P. Reyes sa mga nagwagi at kanilang coaches na ang kanyang panawagan ay patuloy na suportahan ang mga kinatawan ng rehiyon na sasabak sa National Skills Competition na gaganapin sa darating na Nobyembre. (DN/PIA-OrMin)