Ang aktibidad tinutuyo nga tipunon ang mga serbisyo nga kinahanglan sa pagproseso kang rehistrasyon kaangay kang neuro-psychiatric exam, drug test, police clearance kag pagpa-notaryo.

Sa sangka press briefing, ginhambal ni Police Lt. Richard Lumbres kang Regional Civil Security Unit (RCSU) 6 Firearms and Explosives Unit nga may 1,800 ka mga armas luthang nga wara ma-rehistryo sa probinsya kang Antique, 461 ka dya nga numero ang halin sa banwa kang San Jose.

Gin-klaro man ni Lumbres nga kinahanglan ipatago sa pinaka-marapit nga istasyon kang pulis ang mga armas luthang nga wara ma-rehistro pati man ang mga “paltik” ukon homemade nga pusil.

Si Edgar Alcoriza, sangka retired army personnel, nag-tambong sa caravan para i-renew ang rehistrasyon kang ana pusil kag naghambal nga bahol ang ana na-tipid nga tiyempo kag gasto kay indi na ron kinahanglan mag-adto sa Iloilo City.

Ana man gina-paabot ang duro pa nga LTOPF caravan sa probinsya kay dya nga aktibidad naga-tugro kang mas hapos kag komportable nga pamaagi sa pagpa-rehistro.

Ang regional LTOPF caravan sa Antique sangka kolaborasyon sa tunga kang Police Regional Office (PRO) 6, Local Government Unit (LGU) kag Municipal Police Station (MPS) kang San Jose de Buenavista kag kang Robinsons Place Antique. (AAL/SNA/BPS/PIA Antique)