Si NTC7 Engineer III Engr. Bill Peralta kauban si PIA7 Information Officer III Hazel Gloria atol sa gipahigayon nga Kapihan sa PIA interview niadtong Septyembre 8. Ang opisyal mihatag ug dugang detalye kabahin sa mikatap karon nga scam text messages ug mipaambit usab og mga pahimangno ngadto sa publiko sa paglikay nga mabiktima niining matang sa pagpangilad. (Screenshot gikan sa PIA7 FB Live via Zoom)
CEBU CITY, Cebu, Sept.11 (PIA) -- Mipahimangno ang National Telecommunications Commission Region 7 (NTC7) sa publiko, kini kabahin sa bag-ong mikatap karon nga mga scam text messages.
Matod sa NTC7, padayun karon ang ilang pag edukar sa publiko ilabi na katung mga tig gamitan ug mga mobile phones nga kanunay magbinantayon aron nga dili mabiktima niining mga scammers pinaagi sa pagpadala ug mga scam messages nga mitanyag ug mga lain-laing klase nga benepisyo nga may kalambigitan sa kwarta.
Gipahimangnuan sa ahensya ang publiko nga dili basta-basta motuo sa mga mensahe nga maghatag kunohay ug kwarta sa dinaliang pamaagi kay dako ang posilbilidad nga kini usa ka scam.
“Kung naay mo text nimu nga ang mogawas kay random 11-digit sim number niya nag-ingon nga nakadaog kuno ka og kwarta, ayaw mog tuo ana kay scam na siya. Naa sad ron nga bag-ong modus nga naa kunoy technical repair ang certain telephone companies niya nangayo ninyu ug OTP, most likely scam sad na siya” batbat ni Engr. Bill Peralta, Engineer III sa NTC7 atol sa gipahigayon nga “Kapihan sa PIA” interview niadtong Septyembre 8.
Kabahin usab niini, gidasig sa NTC ang mga nakadawat sa nahisgotang klase sa text messages nga mopadangat ngadto sa ilang opisina pinaagi sa pag screenshot sa text message ug pag email niini ngadto kanila aron nga opisyal nga ma record ug ma report kini nga panghitabo.
“What we can do is to block the sim, kay dili man ta law enforcement agencies, kung gusto nila madakpan ning mga scammers kinahangland sila mo file og formal complaint ngadto sa cybercrime unit either sa NBI or sa PNP” dugang ni Engr. Peralta.
Subay niining bag-o nga problema kabahin sa mga scam text messages, ang NTC7 mipadayag sa ilang dakong suporta ug nanghinaot nga maaprubahan na unta ang “Sim Card Registration Bill” kay sa higayon nga kini mahimung balaod kinahanaglan na unyang ipa rehistro ang mga sim card numbers sa dili pa kini magamit kung diin kini nga polisiya dakong tabang aron nga mapakgang ang pagkatap sa mga scam messages.
Ang dakong tumong karon sa NTC mao ang paghatag ug saktong impormasyon ngadto sa publiko ug pag-awhag sa katawhan nga magtinabangay sa pagpasidaan aron nga ang tanan makahibalo sa mga butang nga angay buhaton sa higayon nga makadawat og mga scam text messages aron nga dili mabiktima niini. (RGC/PIA7 Cebu)
