SAN JOSE Antique (PIA) – Ang National Food Authority (NFA) padayon nga nagapamakal kang paray halin sa mga mangunguma kag organisasyon kang mga mangunguma ridya sa Antique.
Suno kay NFA Iloilo and Antique Branch Manager Glenda Paz, sa sangka paghinun-anun sa mga mamahayag, nga sa idalom kang Rice Tariffication Law ukon Republic Act No.11203, ang NFA magapatigayon kang pagpamakal kang paray agud mapasiguro ang siguridad kang pagkaun sa pungsod.
Ang pagpamakal padayun nga ginahimo ilabi na gid sa ginapaabot nga bilulan kang tag-arani halin Septyembre asta Disyembre.
Ana man ginpasarigsarig ang mga Antiqueño kang bastante nga suplay ang bugas tungud nga may mga bodega pa sa NFA Iloilo nga magabulig sa ti-un nga mag-gamay ang paray sa Antique.
Ginahambal na man nga ang mobile pro-
curement program anda gid ginasustinir para sa mga marayo nga mga kabanwahanon.
Samtang, ginapangabay kang ahensiya nga makig-angut kang temprano sa andang opisina agud mapreparar ang mga logistics nga anda kinahanglanun.
Ang NFA nagabakal kang paray sa presyo nga P19.00 kada kilo, limpyo kag mara. Ginsaysay man ni Paz nga ang NFA sa idalom kang Republic Act No. 11203, wara run ti superbisyon sa mga nagabaligya kang bugas sa tindahan pero sanda naga tugro kang bastante nga suplay kang bugas sa tion kang emerhensya.(JBG/SRA/SJQ/PIA-Antique)
