TAGBILARAN CITY, Bohol, Sept. 12 (PIA) -- Gi-aprobahan na ni Presidente Ferdinand “Bongbong” Marcos Jr. ang rekomendasyon sa Inter Agency Task Force (IATF) kalabot sa giduso nga boluntaryong pagsuot og face mask sa outdoor areas.

Kini ang gikumpirmar ni Press Secretary Atty. Trixie Cruz Angeles human na usab gipagawas ang Executive Order Number 3.

Apan matud pa sa Press Secretary, ang tanang non-fully vaccinated nga mga senior citizens ug immuno compromised dili sakop sa EO No. 3 tungod kay kinahanglan pa gihapon nila magsuot og facemask bisan asa sila moadto.

Apil na usab sa tanang pampubliko nga sakyanan ug indoor areas kinahanglan pa usab ang pagsuot og face mask.

Tungod niini, gimanduan ang Department of Health (DOH)  nga i-update ang Minimum Public Health Standards (MPHS) Guidelines kauban ang gipagawas nga kamanduan.

Dugang pa niini, malipayong gibalita ni Cruz-Angeles  nga  “we are 6 percent away from the wall of immunity.”

Matud pa nga kini ang hinungdan kun nganong kampante ang tanan kabahin sa face masks.

Kahunimdoman nga makuting gisusi ni Presidente Marcos ang rekomendasyon sa Inter-Agency Task Force for the Management of Emerging Infectious Diseases (IATF-EID) sa boluntaryong paggamit og face mask sa gawas.

Namugna ang rekomendasyon human makig-pulong si Marcos sa mga opisyal sa DOH ug Department of the Interior and Local Government (DILG) sa Palasyo sa Malakanyang. (ECB/PIA7-Bohol)