CEBU CITY, Cebu, Sept. 13 (PIA) -- Gisugdan ni Presidente Ferdinand Marcos Jr. ang iyang espesyal nga adlaw, ang kasaulogan sa iyang ika-65 nga adlawng natawhan, pinaagi sa kick-off ceremony sa nasudnong kalihokan sa pagpananom og kawayan ug kahoy didto sa Pintong Bukawe, San Mateo, Rizal.
Sa iyang mensahe, si Presidente Marcos miingon nga nakahukom siya sa pagsaulog sa iyang adlawng natawhan sa makahuluganong paagi. Kini pinaagi sa tree planting ceremony ubos sa Department of Environment and Natural Resources ug sa Department of the Interior and Local Government nga “Buhayin ang Pangangalaga ng Kalikasan” tree planting nga inisyatibo.
Ang Presidente nag-ingon nga iyang gikonsiderar nga "symbolic" ang maong aktibidad tungod kay ang Old San Mateo Sanitary Landfill nga kaniadto usa ka eyesore ug environmental disaster area gamiton na alang sa National Greening Program sa gobyerno.
"The National Greening Program will generate jobs, will generate opportunities, and will generate livelihood for our countrymen," matod ni Presidente Marcos.
Ang greening program sa DENR nagtinguha sa pagpalambo sa 46,265 ka ektarya nga reforestation sites sa 2022, aron maapil sa kapin sa duha ka milyon ka ektarya sa reforestation sites nga natukod gikan sa tuig 2011 ngadto sa 2021.
“More than the economic benefit of this activity, we are essentially and primarily investing in ensuring that our planet remains a safe space” dugang sa Presidente.
Gihatagan si Presidente Marcos og cake human siya nangulo sa seremonyal nga pagpananom og kahoy diin iyang gitamnan ang ‘Kawayang Tinik’ (Bambusa blumeana) nga sagad gigamit isip culms sa construction, basketry, furniture, parquets, chopsticks, koral ug isip utanon sa mga linghod nga sanga niini.
Si Presidente Marcos nagpasalamat usab sa mga ahensya sa gobyerno, local government units ug civil society organizations sa ilang bililhong kontribusyon sa pagpanalipod sa kinaiyahan pinaagi sa tree planting activity.
Kapin sa 8,000 ka seedlings ug bamboo planting stocks ang itanom sa rehiyon sa CALABARZON.
Sa talaan sa DENR - CALABARZON, mokabat sa 2,000 ka kawayan ug 100 ka punoan nga mamunga ang itanom sa San Mateo, Rizal.
Gigamit sa DENR ang 'kawayang tinik' bamboo variant alang sa kalihokan nga makahimo sa pagsuhop sa mga bug-at nga metal ug methane nga makita sa mga landfill.
Si Presidente Marcos giubanan nila ni DILG Secretary Benjamin Abalos Jr., DENR Secretary Ma. Antonia Yulo-Loyzaga, Rizal Governor Nina Ricci Ynares, Rizal 3rd District Representative Jose Arturo "Jojo" Garcia ug San Mateo Mayor Bartolome Rivera Jr., ug uban pang lokal nga opisyal atol sa nationwide kickoff. (RGC/PIA7 Cebu)
