TAGBILARAN CITY, Bohol, Sept. 14 (PIA) -- Napulo ug tulo ka mga pumpboats ug 11 ka mga makina nga tag 13 caballos ang gitunol sa usa ka international nga pundok nga nagtabang sa mga biktimas sa mga katalagman, didto sa isla sa Inanuran, sakop  sa Barangay Matabao sa lungsod sa Tubigon, Septembre 14.

Ang mga pumpboats, gihatag sa Camillian Disaster Service (CADIS) International isip kabahin sa tabang sa Camillian Task Force Ministers of the Infirm Philippine province pinaagi sa Society of Ex Camillian Seminarians Incorporated (SeCSI) dinhi sa Bohol.

Ang 13 ka mga pumpboats, agi og hatag-hulip sa mga pumpboats nga iya sa mga mananagat sa isla apan gidakdak ug nangaguba sa bagyo niadtong Enero 2021.

Ang Inanuran adunay 29 ka bubong nga may 42 ka banay, ug  ang kinatibuk-ang mga tawo sa isla moabut sa 170.

Niadtong pila ka oras sa wala pa moigo ang bagyo, nagmandu ang kola nga kagamhanan sa Tubigon sa paghiklin, apan may daghan nga mga bangka sa isla nga ditto gipangsaka sa kamad-an, aron dili madakdan inig abut  sa mga dagkong bawod.

Apan, saysay sa pipila ka kalalakin-an nga nagpabilin sa isla aron may makabantay sa mga kabalayan nga gipangbiyaan, misaka ang dagat ngadto sa 10 ka piyes, lapas sa tawo ug giabut gayud ang mga habug nga lugar sa isla.

Sa pagbanlas sa mga bawod, nanggisungag ang mga pumpboat nga abi nilag luwas na sa kadaut.

Paglurang sa hangin, dul-an sa 20 ka mga pumpboat ang nangakay-ag, duha lamang ka makina ang ilang nahipos samtang ang isla napuno sa mga tablon, buak nga kasko, mga bali nga pamawong  ug pisapisa sa mga katig nga nangabungkag.

Gani, matud pa sa mga taga didto, nahapay ang tanang kabalayan sa isla, lakip na ang ilang kapilya nga may sandayong sa tubig uwan paingon sa ilang tinubdan sa tubig.

Apan sa paglurang usab sa bagyo, namalik ang kasibot sa mga taga isla nga mobalik ug magtinabangay aron makabangon.

Pinaagi usab sa tabang sa Diyosesis sa Tagbilaran uban ni Bishop Abet Uy, sa mga SECSI ug sa mga mabuot nga Bol-anon, nakatigum ang kahugpungan sa mga kanhi seminarista og ikatabang sa pagpamalit og i-atup, ikahaligi ug ikabongbong sa mga balay nga ipabarug og balik.

Tungod sa kakuwang na sa ilang panginabuhi-an, nakitan usab sa mga mingboluntaryo og tabang sa taga isla ang panginahanglan sa mga sakayan nga magamit nila sa pagpanagat aron makabalik sa pagbarug.

Dungan usab sa hangyo ni Rev Fr Roy Reambonanza, mibalik ang mga SECSI sa pagdala sa tabang sa Camillian Task Force nga gikan sa CADIS.

Si Fr Reambonanza, nga kanhi seminaristang Kamilyano, nanghangyo og tabang sa iyang mga parokyano nga mangingisda ilabi na sa isla nga nabiktima sa bagyo.

Ang Inanuran, sakop sa Matabao nga sulod pa sa parokya nga gihuptan ni Fr Reambonanza.   

Sa pagtugyan sa mga pumpboats, kini gisugdan sa us aka santos nga misa, dayon ang pagbalaan sa 13 ka mga sakayan, nga gipintalan og puti nga may marka sa selyo sa CADIS ug Camillian Task Force. (RAHC/PIA7 Bohol)