DAUIS, Bohol, Sept. 7 (PIA) -- Aduna pay madawat nga hinabang ang mga banay nga apektado sa bagyo nga Odette nga gikan sa President Carlos P. Garcia, Getafe, Danao, Trinidad, Ubay, ug Talibon, kini gikan sa P13 milyones nga hinabang nga natigum sa Philippine Red Cross (PRC) gikan sa ilang international nga mga Federations.  

Kini human gitunol sa PRC ang tag P5 mil nga multi-purpose cash grant ngadto sa mga taga Getafe, Bohol, ug emergency shelter assistance nga gilangkoban sa mga sin pang atup lakip na ang mga himan sa shelter kit nga nagkantidad og kapin kon kulang P9,600.00 ug gidawat sa mga taga Dauis, didto sa panagtapok sulod sa Dauis Municipal Gymnasium.

Mismo si PRC Chairman Richard Gordon, kauban sa American Red Cross Head of delegation Shir Shah Ayobi ug mga local nga opisyales sa PRC ang mipahiluna sa pagpang-apud-apod sa mga hinabang sa pipila ka mga representante sa mga apektadong banay didto.

Ang mga hinabang, matud pa ni Gordon, dili gikan sa buhis sa katawhan apan gikan sa American Red Cross ug sa International Federation of the Red Cross, ihatag usab sa 1,210 ka mga apektadong banay  nga nawad-an intawon og panimalay ug nagkinahanglang makabakod gikan sa bagyo, niadtong Disyembre 2021.

Madawat nila ang mga currogated nga galvanized iron sheets, plan GI sheets, ug mga himan sa balay sama sa kabra, pala, ug laing mga himan sa balay.

Sa laing bahin, mokabat sa 358 ka mga banay usab ang makadawat sa tag P5,000 nga hinabang nga cash.

Sa kalihukan didto sa Dauis, pipila sa 358 ka mga benepisaryong banay ang una na nga midawat sa tabang, samtang may mga mayor sa mga kalungsuran nga didto ug gipahibaw nga may paabuton usab silang hinabang.

Miadto sa pagpang-apud-apod sa hinabang sila Mayor Roberto Cajes sa Trinidad, Mayor Ian Gil Mendez sa San Miguel, si Bise mayor Victor Bonghanoy sa Ubay, uban sa kagawad nga si Violeta Reyes, representante sa Disaster and Risk Reduction Office sa Getafe.

Tungod kay pipila pa lamang ka mga banay nga apektado sa bagyo ang mingdawat sa hinabang, mahimo nga sa sunod nga mga adlaw, moabut na ang mga hinabang sa mga kalungsuran nga nahinganlan sa unahan.

Ang hinabang sa PRC, subay sa listahan nga gipahiluna sa mga Red Cross Volunteers, ug dili subay sa listahan nga  gikan sa mga munisipyo, kini aron pagseguro nga walay pamolitika nga mahitabo, palubad ni Gordon.

Walay makadawat kon walay Red Cross beneficiary card, nga gikan lamang usab sa Red cross ug unang gipang-hatag sa mga Red Cross volunteers, dason ni Gordon. 

Mga taga Getafe lamang ug mga taga Dauis lamang ang gitunolan sa mga hinabang didto, Septembre 6.

Ang mga hinabang nga madawat sa mga Bol-anon, kabahin usab sa P455 milyones nga kinatibuk-ang humanitarian ug development assistance gikan sa PRC ngadto sa mga banay nga apektado sa bagyong Odette ug uban pang katalagman nga ming-igo sa kabisay-an ug Mindanao, gikan sa Disyembre 2021 nagdto sa Septembre 2022, segun sa PRC. (RAHC/PIA7 Bohol)