DIPOLOG CITY, Zamboanga del Norte, Sept. 19 (PIA) – Gilusad sa Environmental Management Bureau Region IX pinaagi sa Solid Waste Management Section ang National Plan of Action for the Prevention, Reduction, and Management of Marine Litter (MPOA-ML) atol sa Information and Education Campaign kon IEC Summit 2022 kaniadtong Setyembre 14-15, sa Manuel Resort, Zamboanga del Norte.

Kini gihimo isip lakang sa gobyerno pagsumpo sa problema sa marine litter pollution ug pagprotektar sa nasud partikular na sa kabaybayonan niini alang na usab sa pagpakusog sa kapasidad sa pangagamhanang lokal ug sa pagpatuman sa NPOA-ML sa lokal nga lebel.

Apil sa miduyog sa maong kalihokan ang mga aktibong miyembro sa Regional Ecology Center (REC) nga gilangkuban sa Department of Education, Department of the Interior and Local Government Unit, Department of Agriculture, Department of Public Works and Highways, Department of Science and Technology, ug National Economic Development Authority sa Rehiyon 9.

Samtang, 70 ka Municipal ENRO’s ang miapil ug mireprentar sa ilang tagsa-tagsa ka LGUs ug nanumpa sa ilang suporta sa DENR.

Sa mensahe ni DENR Regional Executive Director Ronald Gadot, iyang gipamahayag nga sama sa ecosystem nga dili mogana kung wala ang ubang microorganisms, and DENR dili usab epektibong makapatuman sa maong plano kung wala ang suporta sa ilang mga partner agencies ilabina ang LGUs.

Sa laing bahin, gibutyag ni EMB IX Regional Director, Engr. Alex Jimenez, nga ang Zamboanga Peninsula ang nag-una sa produksyon sa export quality marine products busa gikinahanglan gayud ang pagtinabangay sa pagpanalipod sa atong kadagatan batok sa polusyon gumikan sa mga marine litters.

Tumong usab sa IEC Summit mao ang pagpausbong sa kagamhanang lokal kabahin sa Sanitary Landfill Design, pagpauswag ug pag-update sa LGU-Solid Waste Management Self-Compliance Monitoring and Auditing Report ug Online Reporting Format subay sa Sec. 24 ug ubang Best Practices of Local Solid Waste Management Implementation. (RVC/GCC/EDT/RBC-GIP/PIA-Zamboanga del Norte)