DAGOHOY, Bohol, Sept. 27 (PIA) -- Gilusad ang Dagohoy Solar Power Project (DSPP) nga may kapasidad nga mahimong moabut sa 22-27 ka megawatts nga gahum dagitab uban sa paglubong sa kapsula nga maoy gisudlan sa mga desinyo sa proyekto nga maoy labing una sa ingon niining matang sa Central Visayas.

Mismo si Gobernador Erico Aristotle Aumentado, kauban ni Dagohoy Mayor ug Dr. Herminio Relampagos ug kapitan sa San Vicente Dagohoy Renato Saguing ang mga local nga opisyales nga nakigduyog sa mga opisyales sa PetroGreen Energy Corporation sa paglubong sa kapsula alang sa 22 ektaryas nga solar farm, dinhi.

Matud ni Francisco Delfin Jr., Vice president ug chief operations officer sa PetroGreen Energy Corporation niadto pang 2019 unta sugdan ang proyekto, apan naabtan sa COVID.

Ang kakuwang sa daku nga tinubdan sa koryente nga magagikan mismo sa Bohol, maoy numero uno nga nakapaaghat sa kompanya nga magtukod sa ilang solar project dinhi, padayag ni Delfin.

Gipasalig usab sa opisyal sa usa sa labing daku nga kompanya nga naghatag og solusyon sa suliran sa loryente sa nasud, nga ang solar project, walay aso, walay higaw nga ilabay ug walay baho kay hini nagpupo lamang sa kainit sa adlaw pinaagi sa liboan ka photo voltaic cells nga ilatag sa 22 ektarya nga yuta.

Wala kini epekto sa mga kabasakan kay gilikayan niini ang mga nay tinanum, walay balay nga ma-igo ug walay kayutaan nga gigamit ang maapektohan, pasalig ni Delfin.

Si Gobernador Aumentado sa iyang kabahin, mapasalamaton sa PetroGreen Energy Corporation kay kini madugang na sa paningkamot nga magdala dinhi sa Bohol sa kaugalingong tinubdan sa koryente.

Ang kasaligan nga tinubdan sa koryente, usa ka dakung haligi sa kaugmaran, saysay sa gobernador taliwala sa mga baga nga duot sa katawhan nga ming-abiba sa paglusad nga kalihukan.

Natukod sulod sa unang 100 ka adlaw sa pamunuan ni Aumentado, ang solar power project mao nay sinugdanan sa tubag alang sa mulo sa katawhan nga limpyo nga enerhiya sa Bohol.

Kini maoy pruweba nga mahimong makab-ot ang kaugmaran nga dili magsakripisyo sa talandugon nga kahimtang sa kalikopan, dayag sa gobernador.

Sa iyang kabahin usab, si Mayor Relampagos mibutyag nga pinaagi sa proyekto, ang lungsod sa Dagohoy mahimong makadawat sa revenues, ug maapil usab sa kita niini ang barangay San Vicente.

Segun sa Energy Law, ang local nga kagamhanan nga maoy gibarugan sa proyekto, segun sa balaod, makadawat og porsyento sa matag kilowatt nga ikapagawas gikan sa planta.

Niini, may seguro na  nga kita ang lungsod og barangay, may daku pang kahigayunan nga ang mga katawhan nga taga Dagohoy, maka trabaho sa construction phase sa proyekto.

Gibanabana nga moabut sa 800 ka tawo ang posibleng magamit sa construction phase sa proyekto, matud sa PetroGreen. (RAHC/PIA7 Bohol)