LUNGSOD NG CALAPAN, Oriental Mindoro (PIA) – Matapos pasinayaan ay agad na inilunsad sa taongbayan ang programang ‘Serbisyong TAMA (TAumbayan and MAsusunod) Calapan City Help Desk’ sa pangunguna ni Mayor Malou Flores-Morillo at mga kasapi ng Liga ng mga Barangay upang magbigay serbisyo sa mga Calapeño na ginanap sa Oriental Mindoro Provincial Hospital (OMPH), Barangay Sta. Isabel sa lungsod na ito kamakailan.

Ang nasabing programa ay inisyatibo ng mga kapitan ng barangay sa lungsod bilang tugon sa mga pangangailangan ng mga Calapeño na maa-admit sa OMPH.

Ilan sa mga tulong na ipagkakaloob ng nasabing help desk ay ang pag-asiste para ma-admit ang pasyente hanggang sa paglabas nito sa OMPH na kabilang din ang pag tulong sa pagkuha ng mga laboratory test at bayarin sa ospital, gamot mula sa pamahalaang lungsod at pamahalaang panlalawigan. Gayundin ang suporta mula sa mga party-list at kongresista sa kongreso at iba pa na posibleng mapagkuhanan ng tulong.