CITY OF ILAGAN, Isabela (PIA) - - Nagsagawa ng malawakang operation timbang, pag-display ng banner, at paglagda ng mga kasunduan ang DTI Isabela bilang pangunahing aktbidad sa pagdiriwang ng Consumer Welfare Month ngayong Oktubre.

Ang naturang aktibidad ay pinangunahan ng DTI Isabela, katuwang ang mga Local Government Units sa lalawigan at mga pribadong institusyon.

Sinabi ni DTI Isabela Provincial Director Ma. Sofia Narag na 700 timbangan ang sumailalim sa pagsusuri at inspeksiyon ng pinagsamang inspectorate team ng mga LGU at DTI sa isinagawang operation timbang, kung saan ilan sa mga timbangan ay may nakitang depekto at ang mga ito ay kinuha at ipinasakamay sa mg LGU para sa calibration.

Samantala, nakiisa rin ang mga LGUs sa Consumer Welfare Month kung saan nag-display ang mga ito ng banner sa kani-kanilang mga munisipyo at pampublikong pamilihan bilang suporta sa nasabing pagdiriwang.

Lumagda rin ang DTI, LGUs at pribadong pamilihan para gawing pormal at paigtingin ang kooperasyon sa pagsulong ng consumer awareness and protection kung saan ang DTI ay nakipagkasundo sa Xentro Mall Ilagan, Ilagan City Xentro Mall, Xentro Mall Roxas, Xentro Mall Tumauini, at Northstar Mall sa Lungsod ng Ilagan

Ang nasabing kasunduan ay nagsasaad ng paglalagay ng consumer welfare desks, information corners at pagsasagawa ng customer and employee relations training activities na naglalayong itaguyod ang kaparatan ng mga mamimili. 

Nakatakda pang magsagawa ng iba’t ibang aktibidad ang DTI Isabela para sa isang buwan na selebrasyon katulad ng enforcement of fair trade laws, consumer and business education campaigns, a consumer quiz show, infomercial-making competition, at ang pinaka-aabangang Isabela Consumer Convergence. (MGE / PIA Isabela)