KALIBO, Aklan (PIA) --  Naga implementar makaron it mga tikang ro Bureau of Fisheries and Aquatic Resources (BFAR) iya sa Aklan ag ro gobyerno lokal it Malay agud indi makasueod  ro mga taeaba nga halin sa probinsya it Capiz pagkatapos nga masayran nga ro kadagatan it an-um (6) ka lugar idto – Panay, Pilar, Roxas City, Ivisan, Sapian ag President Roxas hay nag positibo sa Paralytic Shellfish Poison (PSP) ukon red tide.

Una nga nakonpirma nga may red tide ro Panay, Pilar ag Roxas City ku Septyembre 29, 2022 it BFAR, samtang to Ivisan, Sapian ag President Roxas hay na konpirma nga positibo ku Oktubre 5.

Kon owa it nasambit nga papeles, indi makasueod ro produkto sa isla.

Nag guwa rayang pagklaro pagkatapos nga nasayuran sa pinaka ulihing meeting it Provincial Local Price Coordinating Council antes sa pag-anunsyo it BFAR nahanungod  sa red tide nga naga apekto sa pilang lugar sa Capiz, nga may mga establisimyento sa isla nga naga serbe it taeaba nga halin sa Roxas City kon siin ro iba kara hay ginabutang gid sa andang ‘menu’ nga raya hay halin sa Roxas City.

Sa pagpakig-angot sa MAO-Malay paagi sa andang Agricultural Technican for Fisheries Division nga si Reymark Sinel, gin konpirma nana ro ginhambae it taga BFAR-Aklan nga antes makasueod ro mga produkto sa isla it Boracay hay kinahangean anay magpakita ro tag-ana it produkto it papeles nga makapamatuod kon siin ginbuoe raya.

Samtang, bangud sa sitwasyon ngara it mga katubiaanan sa Capiz nga apektado it red tide, pagabantayan man it BFAR-Aklan ro Batan Bay  nga katabuk man lang it Capiz agud masiguro nga euwas ro Aklan sa red tide.

Suno kay De Eyoy, gina "test" ro tubi it Batan Bay kaisaea sa sang buean, pero ingkaso nga magpositibo ra sa red tide hay kada dominggo kara ro pag "test." (JBG/VGV/PIA 6 Aklan)