TAGBILARAN CITY, Bohol, Oct. 7 (PIA) -- Himoon na sa Department of Science and Technology (DOST) ang pagtimbangtimbang sa mga makalusot sa makatintal nga scholarship pinaagi sa pagbalik sa eksaminasyon sa Marso 11 ug 12.

Kini maoy gibutyag ni Bohol DOST Provincial Science and Technology Center Director Vina Antopina, atul sa bag-ong talk show sa PIA Bohol niadtong Miyerkoles sa palis.

Duha ka tuig usab nga giwala una ang eksaminasyon tungod sa pagdili sa pagtapoktapok dala sa pandemya, pasabut ni Antopina, kinsa mibutyag nga ang ilang gibasehan niadtong panahona, ang grado ra gyud sa aplikante sa labing bantugang scholarship sa goberno nga gipaagi sa ahensya.

Kini usab human gibuksan na sa DOST ang pagpanawat sa aplikasyon alang sa scholarship, nga mahimo lamang apila, pinaagi sa online application.

Ang scholarship usab, matud sa DOST, magtutok sa mga kurso nga natumbok na sa nasud nga maoy labing gikinahanglan sa nasud human sa pagtungha sa aplikante.

Kini magseguro nga sa pagtapos sa estudyante, may kasudlan dayun siya nga trabaho ug wala maghitak na lamang ang mga graduates apan wala nay panginahanglan kanila, pasabut sa hepe sa DOST.

Dayag usab sa DOST nga mas lingion nila kadtong mga mokuha sa mga kurso nga nakalista sa mga labing gikinahanglan sa pagpa-ugmad ug pagpatunhay sa nasugdang kabag-ohan sa nasud.

Tuod man, ang DOST scholarships, gitagana alang sa mga kurso nga nag-ubay sa siyensya ug teknolohiya, matud ni Antopina nga karon, mas hatagan nila og prayoridad kadtong dayag nga mga kurso nga makuha lamang sa mga espesyalista nga mga tunghaan alang sa siyensya ug teknolohiya.   

Mahimo nga magpascholar sa medical sciences, apan mas pangitaon sa goberno kadtong mageskwela isip pharmacist apan alang sa paghimo og mga tambal ug dili lamang sa pagdispense niini.

Tumong nato sa nasud nga magpadaghan kita sa mga scientists nga mao nay mopadagan sa nasud ug kapugngan na ang pagpanon sa mga graduates paingon sa gawas tungod sa kakuwang sa kapanarbaho-an.

Ang application sa DOST scholarships, molanat pa sa Disyembre 2, apan matud pa sa DOST, mas maayo nga makasayo og apply aron matabangan pa nga may oras alang sa pagcomply sa mga rekisitos. (RAHC/PIA7 Bohol)