SYUDAD SANG ILOILO (PIA) – Ginpataasan sang Department of Budget and Management (DBM) ang ginpain nga pondo para sa "Buffer Stocking Program" sang National Food Authority (NFA).
Ini sa tinutuyo nga mapat-ud ang bastante nga suplay sang bugas sa pungsod sa tion sang pangkalibutanon nga krisis sa pagkaon.
Halos nagdoble ang pondo para sa Buffer Stocking Program humalin sa P7 ka bilyon sa sini nga tuig nga badyet tubtub P12 ka bilyon sa ginaproponer nga badyet sa 2023.
“By increasing the budgetary allocation for the Buffer Stocking Program, we are stressing the importance of ensuring food affordability, especially rice, which is a staple food for Filipinos. This is also our strategic plan for food security in times of crisis since our country is prone to natural calamities,” pahayag ni DBM Secretary Amenah Pangandaman.
Sa idalum sang ginaproponer nga 2023 National Budget, ang probisyon para sa buffer stock capacity ang gindugangan humalin sa 9 ka adlaw tubtub 15 ka adlaw. Ang ginpain nga P12 bilyones nga badyet para sa Buffer Stocking Program nagatuyo sa pagbakal sang 631,579 metriko tolenada nga palay nagikan sa mga lokal nga mangunguma.
Dugang pa, may yara nga ginpain nga P0.67 bilyones para sa pagbakal sang mataas nga kalidad nga binhi sang palay kag mais para sa seed buffer stocking sa idalum sang Department of Agriculture (DA). Ini agud mapat-ud ang bastante nga supply sang binhi nga pagagamiton sa tion sang kalamidad kag emerhensiya nga naga-apekto sa produksyon sang palay kag mais.
Ang dugang nga ginpain nga badyet para sa Buffer Stocking Program nagasuporta man 8-point Socioeconomic Agenda sang administrasyong Marcos nga ang seguridad sa pagkaon amo ang nagapanguna nga prayoridad.
Para sa fiscal year 2023, nagpain ang Marcos administration sang kabilugan nga P184.1 bilyones para sa sektor sang agrikultura agud mapat-ud ang seguridad sa pagkaon kag agricultural productivity. Ini ang 39.2 porsyento nga mas mataas ipaanggid sa ginpain sang 2022.
Sa iya Budget Message, ginpahayag ni Presidente Ferdinand Marcos, Jr. nga ang “Agriculture remains one of the main drivers of our push for growth and employment. Hence, it is both a top concern and a top priority of my Administration.” (JBG/dbm/laf/PIA6-Iloilo)
