TAGBILARAN CITY, Bohol, Oct. 17 (PIA) -- Napulo ug upat ka mga kabatan-onan nga Out-Of-School (OSY) sa Tagbilaran, Cortes ug Baclayon ang gipailawom karon sa bansaybansay sa pagtudlo ug pagpakat-on sa negosyo ilawom sa Gentrep Z2, ang ikaduhang hugna sa bansaybansay aron makapangnegosyo.

Matud pa ni Department of Trade and Industry Bohol Provincial Director Maria Soledad Balistoy, kining mga kabatan-onan, swerte tungod sa kadaghan sa mga interesado nga mopailawom sa programa, sila pa gyud ang napili alang sa coaching and mentoring program.

Ilawom sa Gentrep Z2, ang mga napili nga mobansay, mopailawom sa libre nga pagmatuto sa pagnegosyo uban sa DTI ug mga kaabag niining mga negosyante sa Bohol Chamber of Commerce and Industry, JCI Jaycees, ug mismong mga negosyante nga napamatud-an na nga labing malampuson sa ilang negosyo.

“Walay laing mas maayong makatug-an sa mga maayong pamaagi sa negosyo, kon dili ang mga negosyante usab,” dayag ni Blair Panong, DTI focal person sa GentrepZ.

Programa nga sanga sa mga kalihukan sa pagtambayayongay sa kagamhanan ug sa United States Agency for International Development (USAid) ubos sa Opportunity 2.0, ang GentrepZ usa ka pioneering program sa DTI, ug mamahimong sumbanan sa ubang mga lalawigan nga gitabangan sa USAID ug parehas nga naningkamot nga makahatag og mas lapad nga kahigayunan sa mga kabatan-onan, butyag usab ni Lucille Alcala Dabhi, USAID Opportunity 2.0 coordinator sa Bohol.

Gihimo nga minugbo nga bersyon sa sikat na kayo nga Kapatid Mentor Me Program sa DTI GoNegosyo ug sa Philippine Competitiveness council agi og abag sa mga gagmay nga mamumuhunan aron moasenso pinaagi sa pag-agak kanila, ang GentrepZ sa Bohol mogamit usab sa susama nga paagi.

Mopailawom sa napulo ka sesyon kauban sa mga inila nga mga negosyate aron makat-on sa tanang abilidad nga gikinahanglan sa malampuson nga pagnegosyo, ang mga nasakop sa ikaduhang hugna sa Gentrep Z2 sila kadtog nakaapil sa Opportunity 2.0 apan wala mopili sa mas sayon nga pagpadayon sa eskwela ug pagpanarbaho, kay ilang gipili ang pagnegosyo.

Sa ilang pagkapili ug paglampus sa bansaybansay sa pagnegosyo, may madawat na sila nga P8,000 isip sinugdang puhunan alang sa ilang mga mahunahunaang pamuhunan, dugang ni PD Balistoy.

Gawas sa abag gikans a DTI, mipasalig usab ang Syudad sa Tagbilaran ug mga katambayayong sa duhang hinabang aron ikapuno sa ilang mga puhunan.

Si kanhi mayor Josh Geesnell Yap kinsa namulong sa ngalan ni Mayor Jane Yap, mibutyag nga sa kanunay, ang City Government anaa magpaluyo samtang ang tanan nagmalaumon sa tagline nga Asenso Pa more. (RAHC/PIA7 Bohol)