SARRAT, Ilocos Norte (PIA) – - Madama ti pannakaiwaras dagiti food packs kadagiti residente a naapektaran iti idadalapus ni Bagyo Neneng iti ili ti Sarrat, Ilocos Norte, daytoy ti impaka-ammo ni  Municipal Disaster Risk Reduction Officer (MDRRMO) Marvin Ganal.

Kinuna ni Ganal nga umaboten iti 118 a pamilia manipud iti naduma-duma a  barangay iti ili ti naikkanen ti food packs.

“Nakaro a naapektaran dagitoy a pamilia kabayatan iti agtul-tuloy a panagtudtudo ken panagangin nga insangbay ni Bagyo Neneng iti  probinsia ti Ilocos Norte idi Domingo," kinuna ni Ganal.

Kadagiti nawarasanen ti food packs,  21 a pamilia iti naikkan manipud iti Barangay San Francisco;  50 a pamilia idiay Barangay San Miguel; 15 idiay Barangay Sta Rosa; tallo idiay Barangay San Marcos; ken 29  pay a pamilia manipud kadagiti naduma-duma a paset iti Sarrat.

“Tunggal pamilia a naapektaran ni Bagyo Neneng iti ili iti Sarrat, innikanmi ti sag-lilima a kilo a bagas, delata a masida, kape, ken dadduma pay a makan,” innayon ni Ganal.

Segun kadagiti dadaulo kadagiti barangay a naapektaran ti bagyo iti ili ti Sarrat, dagiti residente nga agnaed iti nabababbaba a paset ti barangay ti nalayus ken naipangruna a naikkan ti food packs.

“Dakkel a tulong kaniami dagitoy food packs a naawatmi, nangnangruna ita a panawen ti kalamidad,” kinuna ni Jessica Vallejera a taga-Barangay San Miguel. (JCR/FGL/MJTAB/WVM-Intern PIA Ilocos Norte)