LAOAG CITY, (PIA) – Inpasigurado ni Engr. Maria Teresa Bacnat, mangidadaulo ti Office of the Provincial Agriculture iti Ilocos Norte,  nga agitedda iti libre a rehabilitation inputs para kadagiti mannalon a naapektaran ni Bagyo Neneng a nangdalapus ti probinsia itay napan lawas.

Iti kauddian a report manipud iti Provincial Disaster Risk Reduction and Management Office (PDRRMO), agdagup iti 15 nga ili ti naapektaran ni Bagyo Neneng iti Ilocos Norte a buklen iti 111 a barangay ken 4,282 a pamila.

Iti naangay a press conference ni Gobernador Matthew Marcos Manotoc, kinuna ni Bacnat nga adda nakasagana a rehabiltation inputs a maiwaras para kadagiti mannalon tapno masukatan a dagus dagiti nadadael a mulada. 

“Sa mga damages, magbibigay tayo ng rehabilitation inputs sa mga farmers para mapalitan ang mga nasira nilang mga pananim,” kinuna ni Bacnat.

Kadagiti naapektaran a mannalon a nagmula ti kamatis, innayonna a maikkanda iti bukel ti kamatis ken abono.

“Karamihan sa mga nagtanim ng mga kamatis ay nasa early stage palang sila. Pwede nating palitan ang mga ito,” dagdag ni Bacnat.

Kinunana nga umaboten ti P139,214,587.58 ti  balor dagiti nadadael a mula, ken taraken nga ikan iti probinsia gapu kenni Bagyo Neneng. Kabayatanna, agbalor met iti P1,392,100.00 dagiti nadadael nga imprastraktura ken rangtay gapu iti napigsa a tudo ken angin nga insangbay ni Bagyo Neneng. 

Kinuna met ni Gobernador Matthew Marocs Manotoc a mabalin pay nga idanon dagiti kiddaw dagiti mannalon iti programa iti probinsia nga “Agri Ka Dito”.

Babaen iti "Agri Ka Dito, mabalin nga ikiddaw dagiti mannalon dagiti kasapulanda nga agri-inputs. Binulan nga agibunong ti probinsia babaen ti Office of the Provincial Agriculture kadagiti kiddaw dagiti mannalon para iti usarenda nga agtalon. Mapan laeng ited  dagiti mannalon dagiti surat ti kiddawda kadagiti lokal nga agriculture office iti ilida.  (FGL/MJTAB/WVM-Intern PIA Ilocos Norte)