SYUDAD SANG ILOILO (PIA) - - Nagpain ang Department of Budget and Management (DBM) sang P3.52 ka bilyon para sa Land Tenure Security Program (LTSP) sang Department of Agrarian Reform (DAR) sa National Expenditure Program (NEP) 2023 nga ginsumiter sa kongreso.
Ang ginaproponer nga LTSP badyet ang 12.68 porsyento nga mas mataas sa sini nga tuig nga P3.12 bilyones NEP allocation.
Pagagamiton sang DAR ang kantidad sa pagbakal kag pagparehistro sang 27,942 ektaryas nga duta kag sa pagpanagtag sang 27,102 ektaryas nga pribado nga agrikultural kag ginapanag-iyahan nga duta sang gobyerno pabor sa mga Filipino nga mga mangunguma.
Sakop sang P3.52-bilyon nga LTSP nga pondo ang mga masunod nga subprograms: pagbakal kag pagpanagtag sang duta (P3.03 bilyon), non-land transfer activities (P11.89 milyon), kompensasyon sang tag-iya sang duta sang Land Bank of the Philippines (P256.78 milyon), post-land distribution (P65.12 milyon), kag iban pa nga engagements kaangut sa LTSP (P152.95 milyon).
Sa iya mensahe, nagpanaad si Presidente Ferdinand R. Marcos Jr. nga magapanagtag sang duta sa mga Filipino nga mangunguma. Iya man ginpahayag nga ang panguluhan sa idalum sang iya liderato padayon nga magapanindugan sa kinamatarong sang mga mangunguma kag mamumugon sa uma pinaagi sa ginpabaskog nga pagpatuman sang Comprehensive Agrarian Reform Law (CARP).
Sa iya naman bahin, ginpahayag ni DBM Secretary Amenah Pangandaman nga ang pagpain sang pondo para sa LTSP nagatuyo sa pagpa-ayo sang kabuhi kag pagpasanyog sang pagkaproduktibo sang mga Filipino nga mangunguma.
“Ang pag-angkon sang kaugalingon nga duta ang handom sang kadam-an sang aton mga pinalangga nga mangunguma. Dalan ini padulong sa mas mayo nga kabuhi para sa ila,” pahayag ni Secretary Pangandaman.
Gindugang sini nga “Masami naton nga mabatian ang isyu natuhoy sa manubo nga productivity kag kakulang sa kapital kag teknolohiya sang aton nga mga mangunguma, nga naga-apekto sa ila productivity kag kita. Ang masakit pa sini, daku nga porsyento sang kita nila ang ginapain nga pambayad sa tag-iya sang duta nga gina-uma nila. Hopefully po, makabulig ang pagpain naton sang pondo para sa LTSP agud makuha sang aton nga mga mangunguma ang handom nila nga makaangkon sang kaugalingon nila nga duta nga umahon. Luyag naton buligan nga empower sila kag paayuhon ang ila kabuhi,” dugang pa sang Tiglikum sang Badyet.
Ang LTSP isa ka mayor nga hilikuton sang DAR, kaupod ang Agrarian Reform Beneficiaries Development kag Sustainability Program, and Support to Parcelization of Lands for Individual Titling. (JBG/DBM/laf/PIA6-Iloilo)
