KALIBO, Aklan (PIA) -- Bangud sa Executive Order No. 045, indi eon magpasueod ro probinsya it Aklan it buhi nga baboy, mga produkto kara pareho it karne ag iba pa ukon anuman nga produkto nga ginhaluan kara, hilaw man ukon gin preserbar nga halin sa ibang mga probinsya sa isla it Panay.

Raya hay agud nga ma abangan ro pagsueod iya sa Aklan it African Swine Fever (ASF) nga kurundaya eamang hay nasayuran nga may una eon nga mga kaso sa probinsya it Iloilo.

Ginabawae man it Executive Order ro pagsueod it mga produkto it baboy nga indi madeterminar, pati ro semilya kara.

Rayang E.O. 045, nga ginpaguwa ni Governor Jose Enrique Miraflores ku Oktubre 14, hay suno sa nakabutang sa General Ordinance No. 2021-011 nga may tigueo nga “An Ordinance Governing the Prevention and Control of African Swine Fever in the Province of Aklan, Imposing Penalties for Violation Thereof and Appropriating Funds Therefor.”

meeting it Provincial ASF Task Force sa Agricultural Training Institute (ATI) sa Banga, Aklan, may naka establisar nga mga ‘checkpoints’ sa mga dueunan it probinsya agud nga ma inspeksyon ro mga karga ukon bagahe nga daea it mga pasahero halin sa Iloilo ag iba pang parte sa isla it Panay.

 Suno kana, rayang mga ‘checkpoints’ hay sa Altavas, Nabas, Buruanga, ag Caticlan sa Malay.

Ginpasaeamatan nana ro bulig it mga banwa ngara ag nagpanawagan man imaw sa mga kaparehong Aklanon nga indi gid magbitbit it  karne it baboy ag mga produktong himo kara kon gauli halin sa ibang lugar agud maeuwas ro industriya it pag-alaga it baboy sa Aklan.

Suno sa Office of the Provincial Veterinarian (OPVET) ag ATI, 85 porsyento it mga naga alaga it baboy sa Aklan hay mga backyard-raisers. (JBG/VGV/PIA 6 Aklan)